കല്‍പ്പറ്റ: ലോകസഭാ തിരഞ്ഞെടുപ്പിന്റെ പ്രചാരണ ചൂടിനിടെ വയനാട്ടിലെ സ്ഥാനാര്‍ത്ഥി രാഹുല്‍ ഗാന്ധിയോട് ബൈ പറഞ്ഞ് സോഷ്യല്‍ മീഡിയ. വയനാട്ടിലെ ജനങ്ങള്‍ക്ക് രാഹുലിനെ ഇനി വേണ്ടെന്ന സൂചന നല്‍കുന്ന ഹാഷ്ടാഗാണ് എക്‌സില്‍ ഇപ്പോള്‍ ട്രെന്‍ഡിംഗ് ആകുന്നത്. വയനാട്ടിലെ ബിജെപി സ്ഥാനാര്‍ത്ഥി കെ സുരേന്ദ്രനെ ജനങ്ങള്‍ സ്വാഗതം ചെയ്യുന്നുമുണ്ട്. വെല്‍ക്കം കെസ് ബൈ ബൈ രാഗ (#WelcomeKSByeByeRaGa) എന്ന ഹാഷ്ടാഗാണ് എക്‌സില്‍ ട്രെന്‍ഡിംഗ് ആയിരിക്കുന്നത്. എക്‌സിന്റെ ട്രെന്‍ഡിംഗ് ലിസ്റ്റില്‍ അഞ്ചാമതാണ് ഈ ഹാഷ്ടാഗിന്റെ സ്ഥാനം. വയനാട്ടിലെ ജനങ്ങള്‍ മാറ്റം ആഗ്രഹിക്കുന്നുവെന്നതിന്റെ സൂചന കൂടിയാണ് ഈ ഹാഷ്ടാഗ് നല്‍കുന്നത്.
സ്ഥാനാര്‍ത്ഥി പ്രഖ്യാപനത്തിന് പിന്നാലെ കോണ്‍ഗ്രസ് മണ്ഡലത്തില്‍ പ്രചാരണം തുടര്‍ന്നെങ്കിലും സ്ഥാനാര്‍ത്ഥിയായ രാഹുല്‍ മണ്ഡലത്തില്‍ കാല് കുത്തിയിട്ടില്ല. അതേസമയം സ്ഥാനാര്‍ത്ഥി പ്രഖ്യാപനത്തിന് തൊട്ട് പിന്നാലെ എത്തിയ കെ സുരേന്ദ്രന്‍ നാടിന്റെ മനസ്സറിഞ്ഞ് പ്രചാരണം നടത്തുന്നുമുണ്ട്. ഇതിനിടെയാണ് എക്‌സില്‍ ഹാഷ്ടാഗ് ട്രെന്‍ഡിംഗ് ആയിരിക്കുന്നത്. അരലക്ഷത്തിലധികം പേരാണ് ഈ ഹാഷ്ടാഗ് ഉപയോഗിച്ചത്. ഇതേ ട്രെന്‍ഡ് തിരഞ്ഞെടുപ്പിലും പ്രതിഫലിപ്പിക്കാനാണ് സാധ്യതയെന്നാണ് വിലയിരുത്തല്‍.
