തിരുവനന്തപുരം: ചൈന കഴിഞ്ഞാല് ലോകത്തിലെ ഏറ്റവും വലിയ സൂക്ഷ്മ ചെറുകിട ഇടത്തരം സംരംഭങ്ങള്ക്ക് (എംഎസ്എംഇ) അടിത്തറയുള്ള രാജ്യമാണ് ഭാരതം. ഈ മേഖല വൈവിധ്യമാര്ന്ന സേവനങ്ങള് പ്രദാനം ചെയ്യുന്നു. കൂടാതെ 6,000ത്തിലധികം ഉല്പ്പന്നങ്ങളുടെ നിര്മ്മാണത്തില് ഏര്പ്പെട്ടിരിക്കുന്നു പരമ്പരാഗത മുതല് ഹൈടെക് ഇനങ്ങള് വരെ. ഒരു സ്വാശ്രയ സമ്പദ്വ്യവസ്ഥയ്ക്കോ ആത്മനിര്ഭര് ഭാരതത്തിനോ വേണ്ടിയുള്ള നരേന്ദ്രമോദി സര്ക്കാരിന്റെ പ്രേരണയില് രാജ്യത്തെ എംഎസ്എംഇ മേഖല ദ്രുതഗതിയിലുള്ള വളര്ച്ചയാണ് നേടിക്കൊണ്ടിരിക്കുന്നത്.
എംഎസ്എംഇ കളുടെ മികവ് ഉയര്ത്തുന്നതിനും ത്വരിതപ്പെടുത്തുന്നതിനും’ നടപ്പാക്കുന്ന ലോകബാങ്ക് സഹായ പദ്ധതിക്ക് 6,062.45 കോടിയാണ് കേന്ദ്രസര്ക്കാര് അനുവദിച്ചത്
ഏകദേശം 6.3 കോടി സൂക്ഷ്മ വ്യവസായങ്ങളും 3.3 ലക്ഷം ചെറുകിട, 5,000 ഇടത്തരം സംരംഭങ്ങളുമുണ്ട്. രാജ്യത്തെ മൊത്തം എംഎസ്എംഇകളുടെ 14.20 ശതമാനം വിഹിതമുള്ള ഉത്തര്പ്രദേശിലാണ് ഏറ്റവും കൂടുതല് എംഎസ്എംഇകള് ഉള്ളത്. 14 ശതമാനം വിഹിതവുമായി പശ്ചിമ ബംഗാള് രണ്ടാം സ്ഥാനത്തും തമിഴ്നാടും മഹാരാഷ്ട്രയും എട്ട് ശതമാനവുമാണ്.
കേരളത്തിലും ഇതിന്റെ ഗുണഫലം കിട്ടിയിട്ടുണ്ട്. രണ്ട് വര്ഷം കൊണ്ട് സംസ്ഥാനത്ത് 2,40,396 സൂക്ഷ്മ ചെറുകിട ഇടത്തരം സംരംഭങ്ങള് (എംഎസ്എംഇ) ആണ് ആരംഭിക്കാനായത്. 15,167.36 കോടി രൂപയുടെ നിക്ഷേപവും 5,09,740 തൊഴിലവസരങ്ങളും സൃഷ്ടിക്കാനുമായി.
2022 ഏപ്രില് 1 മുതല് 2023 മാര്ച്ച് 31 വരെ 1,39,840 പുതിയ സംരംഭങ്ങളാണ് രജിസ്റ്റര് ചെയ്തത്. 8422 കോടി രൂപയുടെ നിക്ഷേപവും 3,00,051 തൊഴിലവസരങ്ങളും സൃഷ്ടിക്കാനും ഈ കാലയളവില് സാധിച്ചു. 2023 ഏപ്രില് 1 മുതല് 2024 മാര്ച്ച് 15 വരെയുള്ള കാലയളവില് സംസ്ഥാനത്ത് 1,00,556 സംരംഭങ്ങള് ആണ് ആരംഭിച്ചത്. ഈ കാലയളവില് 6745.36 കോടി രൂപയുടെ നിക്ഷേപവും 2,10,776 തൊഴിലവസരങ്ങളും സൃഷ്ടിക്കപ്പെട്ടു.
2023-24 ല് പുതുതായി ആരംഭിച്ച സംരംഭങ്ങളില് മൂന്നിലൊന്ന് (31,240) വനിതാ സംരംഭകരുടേതാണ്. പട്ടികജാതി, പട്ടികവര്ഗ വിഭാഗത്തില്പെട്ടവരുടെ 3375 സംരംഭങ്ങളുമുണ്ട്. സംരംഭങ്ങളുടെ എണ്ണത്തിലും നിക്ഷേപത്തിലും തൊഴിലവസരങ്ങളിലും എറണാകുളം ജില്ലയാണ് മുന്നില്. മലപ്പുറം, തിരുവനന്തപുരം ജില്ലകള് രണ്ടും മൂന്നും സ്ഥാനങ്ങളില്. പാലക്കാട്, തൃശൂര് ജില്ലകളില് 9000ത്തിലേറ പുതിയ സംരംഭങ്ങള് ആരംഭിച്ചിട്ടുണ്ട്. വ്യാവസായികമായി പിന്നാക്കം നില്ക്കുന്ന പത്തനംതിട്ട, കാസര്കോട്, വയനാട്, ഇടുക്കി ജില്ലകളിലായി 13,237 യൂണിറ്റുകള് ആരംഭിക്കുകയും 27,000ത്തിലധികം തൊഴിലവസരങ്ങള് സൃഷ്ടിക്കപ്പെടുകയും ചെയ്തു.
ഈ കാലയളവില് ഉത്പാദന മേഖലയില് 13,790 സംരംഭങ്ങള് ആരംഭിക്കുകയും 1428.15 കോടി രൂപയുടെ നിക്ഷേപവും 37,124 തൊഴിലവസരങ്ങളും സൃഷ്ടിക്കുകയും ചെയ്തു. സേവന മേഖലയില് 44,468 സംരംഭങ്ങളും 2705.13 കോടി രൂപയുടെ നിക്ഷേപവും 96,064 തൊഴിലവസരങ്ങളും ഉണ്ടായി. വ്യാപാരമേഖലയില് 42,298 സംരംഭങ്ങള് ആരംഭിച്ചു. 2612.14 കോടി രൂപയുടെ നിക്ഷേപവും 77,589 തൊഴിലവസരങ്ങളും ഒരുക്കാനായി.
ഉത്പാദന മേഖലയില് 6669 അഗ്രോ ആന്ഡ് ഫുഡ് പ്രൊസസിംഗ് യൂണിറ്റുകള് ആരംഭിച്ചു. സേവന പ്രവര്ത്തന മേഖലയില് 9802 സംരംഭങ്ങളും ഹോട്ടല്, റെസ്റ്റോറന്റ്, കാറ്ററിംഗ് സര്വീസ്, ഭക്ഷ്യ സംസ്കരണ സേവന പ്രവര്ത്തന മേഖലയില് 7448 സംരംഭങ്ങളും വസ്ത്ര ഡിസൈനിങ്, ആഭരങ്ങള്, തയ്യല് എന്നിവയുമായി ബന്ധപ്പെട്ട് 5462 പുതിയ സംരംഭങ്ങളും 2023-24 ല് ആരംഭിച്ചു.
സംരംഭകത്വം പ്രോത്സാഹിപ്പിക്കാനുള്ള വ്യവസായ വകുപ്പിന്റെ പ്രവര്ത്തനങ്ങളുടെ ഭാഗമായി എല്ലാ തദ്ദേശ സ്ഥാപനങ്ങളിലും എന്റര്െ്രെപസ് ഡവലപ്മെന്റ് എകസിക്യൂട്ടീവുമാരെ നിയമിക്കുകയും 1034 ഹെല്പ്പ് ഡെസ്ക്കുകള് സ്ഥാപിക്കുകയും ചെയ്തിരുന്നു. സംരംഭകര്ക്കായി തദ്ദേശ സ്ഥാപനങ്ങളില് നടത്തിയ പൊതു ബോധവത്കരണ പരിപാടിയില് 57,528 പേര് പങ്കെടുത്തു. തുടര്ന്ന് നടത്തിയ വായ്പാ, ലൈസന്സ്, സബ്സിഡി മേകളകളില് ലഭിച്ച അപേക്ഷകളില് 2871 കോടിയോളം രൂപയുടെ വായ്പകളും 3341 ലൈസന്സുകളും 852 സബ്സിഡികളും അനുവദിക്കുകയും ചെയ്തു.
കേരളത്തിന് അഭിമാനിക്കാവുന്ന നേട്ടമാണിതെന്നും ഇത് മറ്റ് പദ്ധതികളുടെ വേഗത്തിലുള്ള നടപ്പാക്കലിന് ഊര്ജ്ജമേകുമെന്നും വ്യവസായ നിയമ കയര് വകുപ്പ് മന്ത്രി പി. രാജീവ് പറഞ്ഞു. സംസ്ഥാനത്തിന്റെ സമ്പദ് ഘടനയിലും തൊഴിലവസരങ്ങള് സൃഷ്ടിക്കുന്നതിലും ഇത്തരം സംരംഭങ്ങള് നിര്ണായകമാണ്. സംരംഭക വര്ഷത്തിന്റെ ഭാഗമായി ഒരു ലക്ഷം എംഎസ്എംഇകള് ആരംഭിക്കാനും മൂന്നു മുതല് നാലു ലക്ഷം വരെ തൊഴില് സൃഷ്ടിക്കാനുമാണ് ലക്ഷ്യമിട്ടത്. തദ്ദേശ സ്വയംഭരണം, സഹകരണം, ഫിഷറീസ്, മൃഗസംരക്ഷണം മുതലായ വകുപ്പുകളുടെ സഹകരണത്തോടെയാണ് പദ്ധതിക്ക് വ്യവസായ വകുപ്പ് തുടക്കമിട്ടതെന്നും മന്ത്രി കൂട്ടിച്ചേര്ത്തു.
