അഖണ്ഡഭാരതത്തിന്റെ ഭാഗമായിരുന്നവര്‍ക്കും മതപരമായ പീഡനം അനുഭവിച്ചവര്‍ക്കും അഭയം നല്‍കേണ്ടത് കടമ: അമിത് ഷാ

ന്യൂദല്‍ഹി: അഖണ്ഡഭാരതത്തിന്റെ ഭാഗമായിരുന്നവര്‍ക്കും മതപരമായ പീഡനം അനുഭവിച്ചവര്‍ക്കും അഭയം നല്‍കേണ്ടത് ധാര്‍മികവും ഭരണഘടനാപരവുമായ കടമയാണെന്ന് ് കേന്ദ്ര ആഭ്യന്തര മന്ത്രി അമിത് ഷാ. ആധുനിക അഫ്ഗാനിസ്താന്‍, ബംഗ്ലാദേശ്, ഭൂട്ടാന്‍, ഭാരതം, മാലദ്വീപ്, നേപ്പാള്‍, മ്യാന്‍മര്‍, പാകിസ്താന്‍, ശ്രീലങ്ക, ടിബറ്റ് എന്നിവിടങ്ങളില്‍ വ്യാപിച്ചുകിടക്കുന്ന ഏകീകൃത ഇന്ത്യയെന്ന ആശയമാണ് അഖണ്ഡഭാരതം

”മുസ്ലീം ജനതയുള്ളതിനാല്‍ പാകിസ്താന്‍ ഇപ്പോള്‍ ഭാരതത്തിന്റെ ഭാഗമല്ല. വിഭജനകാലത്ത് പാകിസ്താനിലെ ജനസംഖ്യയില്‍ 23 ശതമാനം ഹിന്ദുക്കളുണ്ടായിരുന്നു. എന്നാല്‍ ഇന്നത് 3.7 ശതമാനമായി കുറഞ്ഞു. ബാക്കിയുള്ള ഹിന്ദുക്കള്‍ എവിടെ പോയി അവര്‍ ഭാരതത്തിലേക്ക് വന്നിട്ടില്ല. അവര്‍ പാകിസ്താനില്‍ നിര്‍ബന്ധിത മതപരിവര്‍ത്തനത്തിന് വിധേയരാവുകയായിരുന്നു. രണ്ടാംകിട പൗരന്മാരായി കണക്കാക്കപ്പെട്ട അവര്‍ അപമാനിക്കപ്പെട്ടു. അവര്‍ പിന്നെ എങ്ങോട്ടാണ് പോകുക. പാര്‍ലമെന്റും രാഷ്രീയ കക്ഷികളും ഇക്കാര്യത്തില്‍ തീരുമാനമെടുക്കേണ്ടേ, അമിത് ഷാ ചോദിച്ചു.

1952ല്‍ ബംഗ്ലാദേശിലെ ജനസംഖ്യയുടെ 22 ശതമാനം ഹിന്ദുക്കളായിരുന്നുവെന്നും 2011ല്‍ ഇത് 10 ശതമാനമായെന്നും അദ്ദേഹം ചൂണ്ടിക്കാട്ടി. 1992ല്‍ അഫ്ഗാനിസ്താനില്‍ രണ്ടുലക്ഷം ഹിന്ദുക്കളും സിഖുകാരും ഉണ്ടായിരുന്നു. ഇന്നത് 500 മാത്രമാണ്. അവര്‍ക്ക് അവരുടെ മതവിശ്വാസ പ്രകാരം ജീവിക്കാന്‍ അവകാശമില്ലേ ഭാരതം ഒന്നായിരുന്നപ്പോള്‍ അവര്‍ നമ്മുടെ സഹോദരീസഹോദരന്മാരും അമ്മമാരുമായിരുന്നുവെന്നും അദ്ദേഹം പറഞ്ഞു. മുസ്ലീംങ്ങള്‍ക്കും പൗരത്വത്തിന് അപേക്ഷിക്കാമെന്നും ഭരണഘടനയില്‍ അതിനുള്ള വ്യവസ്ഥയുണ്ടൈന്നും പറഞ്ഞ കേന്ദ്ര ആഭ്യന്തര മന്ത്രി, രാജ്യസുരക്ഷയും മറ്റും പരിഗണിച്ച് അക്കാര്യത്തില്‍ സര്‍ക്കാര്‍ തീരുമാനമെടുക്കുമെന്നും കൂട്ടിച്ചേര്‍ത്തു.