കൊച്ചി: പൗരത്വ ഭേദഗതി നിയമത്തിന്റെ മറവില് ജനങ്ങളെ ഭിന്നിപ്പിക്കുകയാണ് എല്ഡിഎഫും യുഡിഎഫും ചെയ്യുന്നതെന്ന് ബിജെപി സംസ്ഥാന അധ്യക്ഷന് കെ. സുരേന്ദ്രന്.
കേരളത്തിലെ മുസ്ലിം സമുദായത്തെ കബളിപ്പിക്കാനാണ് ഇരുമുന്നണികളും ശ്രമിക്കുന്നതെന്നും കൊച്ചിയില് മാധ്യമപ്രവര്ത്തകരോട് സംസാരിക്കവെ അദ്ദേഹം പറഞ്ഞു. പൗരത്വ ഭേദഗതി നിയമം ഭാരതത്തിലെ പൗരന്മാര്ക്ക് വേണ്ടിയല്ല. പാകിസ്ഥാന്, ബംഗ്ലാദേശ്, അഫ്ഗാനിസ്ഥാന് എന്നീ രാജ്യങ്ങളില് മതത്തിന്റെ പേരില് പീഡിപ്പിക്കപ്പെടുന്ന ന്യൂനപക്ഷ വിഭാഗങ്ങള്ക്ക് വേണ്ടിയാണ് ആ നിയമം നിര്മിച്ചത്. അത് നമ്മുടെ രാജ്യത്തിന്റെ ബാധ്യതയാണ്.
ആരുടെയും പൗരത്വം എടുത്തുകളയാന് വേണ്ടിയല്ല ഈ നിയമമെന്ന് മനസിലാക്കിയിട്ടും മുഖ്യമന്ത്രിയും പ്രതിപക്ഷ നേതാവും കേരളത്തിലെ ജനങ്ങളെ തെറ്റിദ്ധരിപ്പിക്കുകയാണ്. ആട്ടിയോടിക്കപ്പെട്ടവര്ക്ക് ഇവിടെ പൗരത്വം കൊടുക്കില്ലെന്നാണ് പിണറായി വിജയന് പറയുന്നത്. അതിന് ആരെങ്കിലും പൗരത്വത്തിന് പിണറായി വിജയനെ സമീപിച്ചിട്ടുണ്ടോ? പൗരത്വത്തിന്റെ കാര്യമെല്ലാം കളക്ടര്മാര് ചെയ്തുകൊള്ളും. അത് ആലോചിച്ച് മുഖ്യമന്ത്രി വിഷമിക്കണ്ട. പൊന്നുരുക്കുന്നിടത്ത് പൂച്ചയ്ക്കെന്താണ് കാര്യം. കേരളം പിണറായി വിജയന് സ്ത്രീധനമായി കിട്ടിയതല്ല. സിഎഎ നമ്മുടെ നാട്ടില് നിയമമായി കഴിഞ്ഞു. ഇനി ആര്ക്കും ഒന്നും ചെയ്യാന് കഴിയില്ല.
കൊല്ലത്ത് ഡിറ്റന്ഷന് സെന്റര് തുടങ്ങിയ ആളാണ് കേരള മുഖ്യമന്ത്രി. രാജ്യത്ത് ആദ്യമായി അനധികൃത കടന്നുകയറ്റക്കാരെ പാര്പ്പിക്കാന് ക്യാമ്പ് തുടങ്ങിയത് കേരളത്തിലാണ്. ആദ്യം സിഎഎ നടപ്പാക്കുന്ന സംസ്ഥാനവും കേരളമായിരിക്കും. മോദി സര്ക്കാരിന്റെ ഗ്യാരന്റിയാണ് സിഎഎ. വാഗ്ദാനങ്ങള് പാലിക്കുന്ന സര്ക്കാരാണ് കേന്ദ്രം ഭരിക്കുന്നത്. സിഎഎക്കെതിരെ കേരളത്തില് സമരം ചെയ്യാന് യുഡിഎഫിനും എല്ഡിഎഫിനും ധൈര്യമുണ്ടോ? പാകിസ്ഥാനിലോ ബംഗ്ലാദേശിലോ മതത്തിന്റെ പേരില് മുസ്ലിംങ്ങള് പീഡിപ്പിക്കപ്പെടുന്നില്ല എന്നിരിക്കെ എന്തിനാണ് മുസ്ലിങ്ങളെയും സിഎഎയില് ഉള്പ്പെടുത്തണമെന്ന് പറയുന്നത്.
ഇന്ഡി മുന്നണി വന്നാല് സിഎഎ അറബിക്കടലില് എറിയുമെന്നാണ് കെ. സുധാകരന് പറയുന്നത്. എന്നാല് രാഹുല് ഗാന്ധിയോ മറ്റ് പിസിസി അധ്യക്ഷന്മാരോ എന്താണ് ഇങ്ങനെ പറയാത്തതെന്നും സുരേന്ദ്രന് ചോദിച്ചു.
