കൊല്ലം: ശ്രീനാരായണഗുരു ഓപ്പണ്‍ സര്വകലാശാലയ്ക്ക് കേന്ദ്രവിദ്യാഭ്യാസ മന്ത്രാലയത്തിന്റെ ഒരു കോടി രൂപയുടെ ഗ്രാന്റ്. കഴിഞ്ഞ ആഗസ്തില്‍ സര്‍വകലാശാല വൈസ് ചാന്‍സലര്‍ ഡോ. പി.എം. മുബാറക് പാഷ യുജിസിക്ക് സമര്‍പ്പിച്ച പ്രത്യേക അപേക്ഷ പരിഗണിച്ചാണ് നടപ്പുവര്‍ഷത്തെ ഗ്രാന്റില്‍ സര്‍വകലാശാലയെ ഉള്‍പ്പെടുത്തിയത്.
10 ഓപ്പണ്‍ സര്‍വകലാശാലകളാണ് ഇത്തവണ ഈ ഗ്രാന്റിന് തെരഞ്ഞെടുക്കപ്പെട്ടത്. യുജിസി തുക സര്വകലാശാലയ്ക്ക് നേരിട്ട് നല്‍കും. പ്രധാനമായും പഠനസാമഗ്രികളുടെ വികസനം, കമ്പ്യൂട്ടര്‍ വത്ക്കരണം, വെര്‍ച്വല്‍ സ്റ്റുഡിയോ, ക്വാളിറ്റി അഷ്വറന്‍സ് പ്രവര്‍ത്തനങ്ങള്‍ എന്നിവയാണ് ഗ്രാന്റിന്റെ പരിധിയില്‍ വരിക.
മൂന്നുവര്‍ഷത്തിനകം സര്‍വകലാശാലയിലെ 28 കോഴ്‌സുകള്‍ക്ക് യുജിസി അംഗീകാരം ലഭിച്ചിട്ടുണ്ട്. മാര്‍ച്ച് 9, 10 തീയതികളില്‍ കൊല്ലത്ത് നടക്കുന്ന സര്‍വകലാശാലയുടെ പ്രഥമ കലോത്സവത്തിന്റെ പ്രവര്‍ത്തനങ്ങള്‍ക്കിടയിലാണ് അംഗീകാരം ലഭിച്ചത്.
