ഇടുക്കി: കുമളിയിൽ അനധികൃതമായി ദത്തെടുത്ത കുട്ടിയെ ദമ്പതികളിൽ നിന്ന് ചൈൽഡ് വെൽഫെയർ കമ്മറ്റി ഏറ്റെടുത്തു. കുട്ടിയെ നിയമപരമായി ദത്തെടുത്തിട്ടില്ലെന്ന കണ്ടെത്തലിനെ തുടർന്നാണ് നടപടി. സംഭവത്തിൽ കുമളി പോലീസ് കേസെടുത്ത് അന്വേഷണം നടത്തി വരികയാണ്.
2022-ലാണ് കേസിന് ആസ്പദമായ സംഭവം. മക്കളില്ലാത്ത ചക്കുപള്ളം സ്വദേശികളായ ദമ്പതികൾ നിർദ്ധനകുടുംബത്തിലെ സ്ത്രീയിൽ നിന്നും കുട്ടിയെ ഏറ്റുവാങ്ങിയിരുന്നു. ഒന്നര വർഷത്തോളം കുട്ടി ഇവർക്കൊപ്പം കഴിഞ്ഞു.
തുടർന്ന് കുട്ടിയുടെ ആരോഗ്യ കാര്യങ്ങൾ ചോദിച്ചറിയുന്നതിനെത്തിയ അങ്കണവാടി പ്രവർത്തകരാണ് വിവരം മേലധികാരികളെ അറിയിച്ചത്. സിഡബ്ല്യുസി കുട്ടിയുടെ സംരക്ഷണം ഏറ്റെടുത്ത് സുരക്ഷിത കേന്ദ്രത്തിലേക്ക് മാറ്റി.
