ഇന്ന് ലോക വന്യജീവി ദിനം. വന്യജീവികൾക്കും അവയുടെ ആവാസ വ്യവസ്ഥയ്ക്കും മുൻതൂക്കം നൽകിയാണ് ഈ ദിനം ആചരിക്കുന്നത്. സകലജീവജാലങ്ങൾക്കും ഭൂമിയിൽ ഒരേ അവകാശമാണുള്ളതെന്നാണ് വൈക്കം മുഹമ്മദ് ബഷീറിന്റെ ‘ഭൂമിയുടെ അവകാശികൾ’ എന്ന കഥയുടെ പ്രമേയം ഇന്നത്തെ ദിനത്തിന്റെ വേരുകൾ ചൂണ്ടിക്കാട്ടുന്നു. അതേസമയം സംസ്ഥാനത്ത് മനുഷ്യ- വന്യജീവി സംഘർഷങ്ങൾ നിരന്തരം ചർച്ചയാകുന്ന വേളയിലാണ് വീണ്ടുമൊരു വന്യജീവി ദിനാചരണം കൂടി എത്തിയിരിക്കുന്നത്.
2013-ൽ ഐക്യരാഷ്ട്രസഭയാണ് ലോകവന്യജീവി ദിനാചരണത്തിന് തുടക്കം കുറിച്ചത്. മനുഷ്യർ ഉൾപ്പടെയുള്ള ജീവികളുടെ സുഗമമായ നിലനിപ്പിന് വനവും വന്യജീവികളും അത്യന്താപേക്ഷിതമാണെന്ന ചിന്തയിൽ നിന്നാണ് ലോക വന്യജീവി ദിനാചരണത്തിന്റെ പിറവി. വന്യജീവി സംരക്ഷണത്തിൽ ഡിജിറ്റൽ ഇന്നവേഷന്റെ സാധ്യതകൾ കണ്ടെത്തുകയെന്നതാണ് ഇത്തവണത്തെ വന്യജീവി ദിനാചരണവുമായി മുന്നോട്ട് വയ്ക്കുന്ന പ്രമേയം.
നിരവധി ആശയങ്ങളോടെയാണ് ഇന്നേ ദിവസം വന്യജീവി ദിനമായി ആചരിക്കുന്നത്. വംശനാശ ഭീഷണി നേരിടുന്ന വന്യജീവികളെ സംരക്ഷിക്കുക, സഹജാവബോധവും സംരക്ഷണതാൽപര്യവും ജനങ്ങളിൽ വളർത്തുക തുടങ്ങിയ ലക്ഷ്യങ്ങളാണ് ലോക വന്യജീവി ദിനാചരണത്തിന് പിന്നിലുള്ളത്.
