എയർ ഇന്ത്യയുടെ ഫ്ളൈറ്റുകൾക്കുള്ളിലെ സുരക്ഷാ നിർദ്ദേശങ്ങൾ രാജ്യത്തെ വിവിധ നൃത്തകലാരൂപങ്ങളുടെ സഹായത്തോടെ ആവശികരിച്ച് ടാറ്റ ഗ്രൂപ്പ്. നൃത്തങ്ങളുടെ കലാവിഷ്കാരം കൂട്ടിയിണക്കി സേഫ്റ്റി മുദ്രാസ് എന്ന പേരിലാണ് പുതിയ വീഡിയോ എയർഇന്ത്യ പുറത്തുവിട്ടിരിക്കുന്നത്. കഥകളി മോഹിനിയാട്ടം തുടങ്ങി കേരളത്തിന്റെ തനത് കലാരൂപങ്ങളും ഇതിൽ ഉൾപ്പെടുന്നു.
വിമാന യാത്രികരുടെ സുരക്ഷാ മുൻകരുതലിന് ഊന്നൽ നൽകുന്നതിനൊപ്പം സാംസ്കാരിക പൈതൃകം എടുത്തുകാട്ടുകയാണ് വീഡിയോയിലൂടെ ചെയ്തിരിക്കുന്നത്. ബിഹു, കഥക്, ഒഡീസി, ഭരതനാട്യം, ഗൂമർ, ഗിദ്ദ എന്നിങ്ങനെ നിരവധി നൃത്തകലാരൂപങ്ങളും വീഡിയോയിൽ കാണാം.
ദൈവത്തിന്റെ സ്വന്താം നാടായ കേരളത്തിന്റെ ഓളപ്പരപ്പുകളിൽ ചിത്രീകരിച്ച വീഡിയോ ഇതിനോടകം തന്നെ വൈറലായി കഴിഞ്ഞു. വിമാനത്തിനുള്ളിലെ ഇലക്ട്രോണിക് ഗാഡ്ജറ്റുകളുടെയും പുകവലിയുടെയും നിരോധന അറിയിപ്പാണ് നൃത്തത്തിലൂടെ വീഡിയോയിൽ വിവരിക്കുന്നത്. അത്യാധുനിക ഇൻ-ഫ്ളൈറ്റ് എന്റർടെയ്മെന്റ് സ്ക്രീനുകളുള്ള എയർ ഇന്ത്യയുടെ പുതിയ എ350 വിമാനങ്ങളിലാകും ആദ്യ ഘട്ടത്തിൽ ഇവ പ്രദർശിപ്പിക്കുക.
