കായംകുളത്ത് മകൻ അമ്മയെ മർദ്ദിച്ച് കൊലപ്പെടുത്തി; കൊലപാതകം ഉത്സവസ്ഥലത്ത് നാട്ടുകാരുമായി വഴക്കിട്ടതിന്

ആലപ്പുഴ: കായംകുളത്ത് മകൻ അമ്മയെ മർദ്ദിച്ച് കൊലപ്പെടുത്തി. പുതുപ്പള്ളി സ്വദേശിനി ശാന്തമ്മ (77) ആണ് മരിച്ചത്. സംഭവത്തിൽ പ്രതിയായ ഇളയ മകൻ ബ്രഹ്‌മദേവനെ പോലീസ് അറസ്റ്റ് ചെയ്തു.

രാവിലെയോടെയായിരുന്നു സംഭവം. ഉത്സവസ്ഥലത്ത് വച്ച് നാട്ടുകാരുമായി വഴക്കിട്ടതിനെ തുടർന്നായിരുന്നു മർദ്ദനം. ശാന്തമ്മയുടെ വീടിന് സമീപത്തെ അമ്പലത്തിൽ ഉത്സവമായിരുന്നു. ഇവിടെ ഭക്ഷണം കഴിച്ചുകൊണ്ടിരിക്കുന്നതിനിടെ ശാന്തമ്മ നാട്ടുകാരിൽ ചിലരുമായി തർക്കമുണ്ടായി. ഇതേ തുടർന്ന് ബ്രഹ്‌മദേവൻ അമ്മയെ വീട്ടിലേക്ക് കൂട്ടിക്കൊണ്ടുപോയി.

വീട്ടിലെത്തിയ ഇരുവരും തമ്മിൽ വാക്ക് തർക്കം ഉണ്ടായി. ഇതിന് പിന്നാലെ അമ്മയെ മർദ്ദിക്കുകയായിരുന്നു. ഇതിനിടെ ശാന്തമ്മയുടെ അടിവയറ്റിൽ ശക്തമായി തൊഴിക്കുകയും തല ഭിത്തിയിൽ ആഞ്ഞിടിക്കുകയുമായിരുന്നു. ഈ അടിയാണ് മരണത്തിന് കാരണമായത്. സംഭവ സ്ഥലത്ത് തന്നെ ശാന്തമ്മ മരിച്ചു. ഉടനെ തന്നെ നാട്ടുകാർ വിവരം പോലീസിനെ അറിയിച്ചു. പോലീസ് എത്തി ബ്രഹ്‌മദേവനെ അറസ്റ്റ് ചെയ്യുകയായിരുന്നു.