മുംബൈ: ഫെയ്‌സ്ബുക്ക് ലൈവിനിടെ ശിവസേന ഉദ്ധവ് വിഭാഗം നേതാവ് വെടിയേറ്റ് മരിച്ചു. ബൊറിവാലി സ്വദേശിയായ കോര്‍പറേറ്റര്‍ അഭിഷേക് ഖോസാല്‍കാറാണ് (40) മരിച്ചത്.
പ്രാദേശിക വ്യാപാരിയായ മൗറിസ് നൊറോണ വെടിവെച്ച് കൊലപ്പെടുത്തുകയായിരുന്നു. ഇയാളേയും പിന്നീട് വെടിയേറ്റ് മരിച്ച നിലയില്‍ കണ്ടെത്തി. മുന്‍ ശിവസേന (യുബിടി) എംഎല്‍എ വിനോദ് ഖോസാല്‍കറുടെ മകനാണ് അഭിഷേക്. വ്യാഴാഴ്ച വൈകിട്ടാണ് സംഭവം.
മൗറിസും അഭിഷേകും തമ്മില്‍ ബിസിനസുമായി ബന്ധപ്പെട്ട് അഭിപ്രായ വ്യത്യാസങ്ങള്‍ ഉണ്ടായിരുന്നു. ഇതെല്ലാം പറഞ്ഞു തീര്‍ക്കാനെന്ന പേരില്‍ മൗറിസ് അഭിഷേകിനെ തന്റെ ഓഫീസിലേക്ക് വിളിപ്പിക്കുകയായിരുന്നു. താനും മൗറിസും ഒരുമിച്ചിരിക്കുന്നത് കണ്ട് ജനം അത്ഭുതപ്പെടും. തങ്ങള്‍ ഇരുവരും തമ്മിലുള്ള പ്രശ്‌നങ്ങളെല്ലാം പറഞ്ഞ് അവസാനിക്കുകയാണ്. ജനങ്ങളുടെ നന്മയ്‌ക്കായാണ് ഈ തീരുമാനമെന്നാണ് അഭിഷേക് ഫേസ്ബുക്കില്‍ പറഞ്ഞത്. പിന്നാലെ മൗറിസ് അഭിഷേകിനു നേരെ മൂന്ന് തവണ വെടിയുതിര്‍ക്കുകയായിരുന്നു. അഭിഷേകിനെ ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
