കേരളത്തിൽ ഭരണഘടനാ സ്ഥാനത്ത് പ്രവർത്തിക്കുന്നവർക്ക് സുരക്ഷയില്ല; സിപിഎം നേതാവിന്റെ മകനായതിനാൽ പിഴയിട്ട് ഒതുക്കി, വിമർശിച്ച് സുരേന്ദ്രൻ

കോഴിക്കോട്: ഭരണഘടനാ സ്ഥാനത്ത് പ്രവർത്തിക്കുന്നവർക്ക് കേരളത്തിൽ സുരക്ഷയില്ലെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ. പിണറായിക്കും പരിവാരങ്ങൾക്കും മാത്രമാണ് പോലീസ് സുരക്ഷയൊരുക്കുന്നത്. കേരളത്തിന്റെ ക്രമസമാധാന നില കേരളത്തിൽ തകർന്നിരിക്കുകയാണെന്നും സുരേന്ദ്രൻ പറഞ്ഞു.

ഗോവ ഗവർണർ പി.എസ് ശ്രീധരൻ പിള്ളയുടെ വാഹനവ്യൂഹത്തിലേക്ക് കാർ ഓടിച്ചുകയറ്റിയ സംഭവത്തെ രൂക്ഷ വിമർശിക്കുകയായിരുന്നു ബിജെപി അദ്ധ്യക്ഷൻ. സിപിഎം നേതാവിന്റെ ക്രിമിനൽ കേസിലെ പ്രതിയായ മകനായതിനാലാണ് പിഴയിട്ട് ഒതുക്കിയതെന്ന് സുരേന്ദ്രൻ വിമർശിച്ചു.

ഗവർണറെ ഭയാനകമായി ഒറ്റപ്പെടുത്തുകയാണ്. ഈ സംഭവത്തിന് ആയിരം രൂപ പിഴയിട്ടാൽ മാത്രം മതിയോ. പിഴയിട്ട് കേസെടുക്കാൻ ആരാണ് പോലീസിന് അധികാരം നൽകിയത്. ഇത് ശരിക്കും നിയമവാഴ്ചയാണെന്നും സുരേന്ദ്രൻ പറഞ്ഞു. സിപിഎം കോഴിക്കോട് ജില്ലാ സെക്രട്ടറി പി. മോഹനന്റെ മകൻ ജൂലിയസ് നികിതാസാണ് കാര്‍ ഓടിച്ചു കയറ്റിയത്.

ഞായറാഴ്ച രാത്രി 7.50ന് സ്വകാര്യ ചടങ്ങ് കഴിഞ്ഞ് ഗവർണർ കോഴിക്കോട്ടെ വസതിയിലേക്ക് വരുമ്പോൾ മാവൂർ റോഡ് പുതിയ ബസ് സ്റ്റാൻഡിനു സമീപം അഴകൊടി ദേവീക്ഷേത്രം റോഡിലേക്കുള്ള ജംഗ്ഷനിലാണ് സംഭവം.