മാനന്തവാടി: തണ്ണീര്ക്കൊമ്പന് ദൗത്യം വിജയകരമായി പൂര്ത്തിയാക്കി. വെളളിയാഴ്ച വെളുപ്പിന് മാനന്തവാടിയിലെ ജനവാസ കേന്ദ്രത്തില് കണ്ട കാട്ടാനയെ രാത്രി പത്ത് മണിയോടെയാണ് കുങ്കി ആനകളുടെ സഹായത്തോടെ ലോറിയില് കയറ്റിയത്.
എലിഫന്റ് ആംബുലന്സില് ആനയെ കര്ണാടകയിലെ രാമപുര ക്യാമ്പിലേക്കാണ് കൊണ്ടുപോകുന്നത്. വൈകിട്ട 5.30 ഓടെയാണ് ആനയെ മയക്കുവെടി വെച്ചത്. രണ്ട് തവണ മയക്ക് വെടിവച്ച ശേഷം ബൂസറ്റര് ഡോസും നല്കി.
ആന ക്യാമ്പിലെത്തിച്ച് രണ്ട് ദിവസം വിദഗ്ധ ചികിത്സ നല്കാനാണ് തീരുമാനം. ആനയുടെ ആരോഗ്യം തൃപ്തികരമാണെന്ന് ഉറപ്പ് വരുത്തി രണ്ട് ദിവസത്തിന് ശേഷം ആനയെ കാട്ടിലേക്ക് തുറന്നുവിടുമെന്നും ബന്ദിപ്പൂര് ഫീല്ഡ് ഡയറക്ടര് അറിയിച്ചു.
കര്ണാടക വനമേഖലയില് നിന്നുമാണ് ആന വയനാട്ടിലെത്തിയത്. ഹാസന് ഡിവിഷന് കീഴില് ഇക്കഴിഞ്ഞ ജനുവരി 16ന് മയക്കുവെടിവെച്ച് പിടികൂടി റേഡിയോ കോളര് ഘടിപ്പിച്ച് കാട്ടില് വിട്ടതാണ് തണ്ണീര് കൊമ്പന്. പതിവായി കാപ്പിത്തോട്ടങ്ങളിലിറങ്ങിയിരുന്ന കാട്ടാന ഇതുവരെയും ആരെയും ഉപദ്രവിച്ചതായി അറിവില്ല.
ദൗത്യം വിജയകരമായി പൂര്ത്തിയാക്കിയ വനം വകുപ്പിനെയും നാട്ടുകാരെയും മാധ്യമപ്രവര്ത്തകരെയും വനം മന്ത്രി എ കെ ശശീന്ദ്രന് അഭിനന്ദിച്ചു.
