വടക്കാഞ്ചേരി: മഹാത്മാഗാന്ധിയുടെ രക്തസാക്ഷിത്വ ദിനാചരണത്തെച്ചൊല്ലി കോണ്‍ഗ്രസ് പ്രവര്‍ത്തകര്‍ തമ്മില്‍ പാര്‍ട്ടി ഓഫീസില്‍ ഏറ്റുമട്ടി. ഇന്നലെ വടക്കാഞ്ചേരി ബ്ലോക്ക് കോണ്‍ഗ്രസ് ഓഫീസില്‍ നടന്ന അനുസ്മരണ ചടങ്ങാണ് സംഘര്‍ഷത്തില്‍ കലാശിച്ചത്.
അനുസ്മരണം നടത്തുന്ന സമയത്തെച്ചൊല്ലിയാണ് തര്‍ക്കം ഉടലെടുത്തത്. ബ്ലോക്ക് കോണ്‍ഗ്രസ് പ്രസിഡന്റ് പി.ജി. ജയദീപ്, മണ്ഡലം പ്രസിഡന്റ് ബിജു ഇസ്മായില്‍ എന്നിവരുടെ നേതൃത്വത്തില്‍ പ്രവര്‍ത്തകര്‍ ഇരുവിഭാഗങ്ങളായി തിരിഞ്ഞ് ഏറ്റുമുട്ടുകയായിരുന്നു. അടിപിടിക്കിടെ ഓഫീസിലെ കസേരകള്‍ തകര്‍ന്നു. ഗാന്ധിജിയുടെ ഫോട്ടോയും നിലവിളക്കുമെല്ലാം താഴെ വീണ ചിത്രങ്ങളും പുറത്തു വന്നു.
സംഘര്‍ഷത്തില്‍ മര്‍ദ്ദനമേറ്റതായി ചൂണ്ടിക്കാട്ടി ഏതാനും പ്രവര്‍ത്തകര്‍ ആശുപത്രിയില്‍ ചികിത്സ തേടി. ഉന്നത കോണ്‍ഗ്രസ് നേതൃത്വത്തിന് പരാതി നല്‍കുമെന്ന് ഇരുവിഭാഗം പ്രവര്‍ത്തകരും പറഞ്ഞു. പ്രാദേശിക കോണ്‍ഗ്രസ് പ്രവര്‍ത്തകര്‍ക്കിടയിലെ ഭിന്നിപ്പ് രൂക്ഷമാണ്.
