തിരുവനന്തപുരം: കോടിക്കണക്കിന് വരുന്ന വിശ്വാസികളുടെ ആരാധനപാത്രവും ഹൈന്ദവ വിശ്വാസത്തിന്റെ പ്രതീകവുമായ ശ്രീരാമനെയും സീതദേവിയേയും യുക്തിവാദികൾ പോലും പറയാത്ത മ്ലേച്ഛമായ രീതിയിൽ അധിക്ഷേപിച്ച സിപിഐ നേതാവും എംഎൽഎയുമായ പി.ബാലചന്ദ്രൻ രാജി വെക്കണമെന്ന് ബി.ജെ.പി സംസ്ഥാന സെക്രട്ടറി എ.നാഗേഷ് പ്രസ്താവനയിൽ ആവശ്യപ്പെട്ടു.
യുക്തിവാദികൾ പോലും ഉപയോഗിക്കാത്ത അത്രയും നീചമായ പദപ്രയോഗങ്ങളാണ് ലോകം ആരാധിക്കുന്ന ഭഗവാൻ ശ്രീരാമനെയും സീതദേവിയേയും കുറിച്ചും എംഎൽഎ പറഞ്ഞിരിക്കുന്നത്. വിശ്വാസകളുടെതടക്കം വോട്ടു നേടി എംഎൽഎയായ പി.ബാലചന്ദ്രൻ അധികാരത്തിലെത്തിയപ്പോൾ തനിനിറം പുറത്തു കാണിക്കുകയാണെന്ന് നാഗേഷ് പറഞ്ഞു.
പി.ബാലചന്ദ്രൻ നടത്തിയിരിക്കുന്നത് സത്യപ്രതിജ്ഞ ലംഘനമാണ്. എംഎൽഎ സ്ഥാനത്ത് തുടരാൻ അദ്ദേഹത്തിന് അർഹതയില്ല. എം.എൽ.എ ക്കെതിരെ കലാപശ്രമത്തിന് കേസെടുത്ത് ജയിലിലടയ്ക്കണം. ഹൈന്ദവ സമൂഹത്തിന്റെ മതവികാരം വ്രണപ്പെടുത്തിയ ജനപ്രതിനിധി കൂടിയായ ബാലചന്ദ്രന്റെ ഫേസ് ബുക്ക് പോസ്റ്റിനെതിരെ കോടതിയെ സമീപിക്കാൻ ബിജെപി തയ്യാറാകും. എംഎൽഎയുടെ ഫേസ് ബുക്ക് പോസ്റ്റിനെ കുറിച്ച് സിപിഐ നേതൃത്വം മറുപടി പറയണമെന്നും നാഗേഷ് പറഞ്ഞു.
