കോഴിക്കോട് : വടകര കുഞ്ഞിപ്പള്ളിയില് കടമുറി പൊളിച്ചു നീക്കുന്നതിനിടെ കണ്ടെത്തിയ തലയോട്ടിയും അസ്ഥിയും കൊയിലാണ്ടി സ്വദേശിയുടേതെന്ന് സംശയം. മൃതദേഹ അവശിഷ്ടങ്ങള്ക്കിടെ ലഭിച്ച മൊബൈല് ഫോണ് കൊയിലാണ്ടി സ്വദേശിയുടേതാണെന്ന് തിരിച്ചറിഞ്ഞിട്ടുണ്ട്. ഇയാളെ കുറേനാളായി കാണാനില്ലെന്ന് ബന്ധുക്കളും പോലീസിനെ അറിയിച്ചിട്ടുണ്ട്.
ദേശീയ പാതാ വികസനത്തിനായി കഴിഞ്ഞ ദിവസം കുഞ്ഞിപ്പള്ളി ടൗണിലെ കെട്ടിടങ്ങള് പൊളിച്ചു നീക്കുന്നതിനിടയിലാണ് അടച്ചിട്ട കടമുറിക്കുള്ളില് തലയോട്ടിയും അസ്ഥിയുടെ ഭാഗങ്ങളും കണ്ടെത്തിയത്. കടമുറിക്കുള്ളില് പ്ലാസ്റ്റിക് മാലിന്യങ്ങള്ക്ക് ഇടയിലായിരുന്നു തലയോട്ടി. തുടര്ന്ന് ചോമ്പാല പോലീസ് സ്ഥലത്തെത്തി നടത്തിയ പരിശോധനയിലാണ് തൊട്ടടുത്ത മുറിയില് നിന്നും വാരിയെല്ലിന്റെ ഭാഗങ്ങളും കണ്ടെത്തുകയായിരുന്നു.
മുമ്പ് ഹോട്ടലായി പ്രവര്ത്തിച്ചിരുന്ന ഈ കടമുറികള് രണ്ട് വര്ഷം മുമ്പ് കുന്നുമ്മക്കര സ്വദേശി ദേശീയ പാതാ അതോറിട്ടിക്ക് കൈമാറിയതാണ്. ഒരു വര്ഷമായി കെട്ടിടം അടഞ്ഞുകിടക്കുകയാണ്. സംഭവത്തില് ഫോറന്സിക് വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി.
