തൃശൂര്: നടനും ബിജെപി നേതാവുമായ സുരേഷ് ഗോപിയുടെ മകളുടെ വിവാഹ ചടങ്ങില് പങ്കെടുക്കാന് പ്രധാനമന്ത്രി നരേന്ദ്രമോദി എത്തുന്ന സാഹചര്യത്തില് ശക്തമായ സുരക്ഷയാണ് ഗുരുവായൂരില് ഒരുക്കുന്നത്. ക്ഷേത്രത്തില് 17ന് രാവിലെ ആറുമുതല് ഒമ്പതുവരെ വിവാഹങ്ങള്ക്ക് അനുമതി നല്കില്ല. നേരത്തെ ബുക്ക് ചെയ്ത വിവാഹങ്ങള് രാവിലെ ആറിനു മുമ്പോ ഒമ്പതിനു ശേഷമോ നടത്തണമെന്ന് പൊലീസ് വിവാഹ പാര്ട്ടിക്കാര്ക്ക് നിര്ദേശം നല്കി.
പ്രധാനമന്ത്രി 17ന് രാവിലെ എട്ടിന് ശ്രീകൃഷ്ണ കോളേജ് ഗ്രൗണ്ടിലെ ഹെലിപാഡില് ഇറങ്ങും. റോഡ് മാര്ഗം 8.10ന് ശ്രീവത്സം ഗസ്റ്റ് ഹൗസില് എത്തും. 8.15ന് ക്ഷേത്ര ദര്ശനം. 20 മിനിറ്റ് ക്ഷേത്രത്തില് ചെലവഴിച്ച ശേഷം ക്ഷേത്രനടയില് സുരേഷ് ഗോപിയുടെ മകളുടെ വിവാഹ ചടങ്ങില് സംബന്ധിക്കും.
രാവിലെ ആറുമുതല് നഗരത്തില് ഗതാഗത നിയന്ത്രണം ഉണ്ടാകും.ചൂണ്ടല് മുതല് ഗുരുവായൂര് ക്ഷേത്രനട വരെ വാഹനങ്ങള്ക്ക് പ്രവേശനം അനുവദിക്കില്ല.കളക്ടര് വി.ആര്. കൃഷ്ണതേജ ക്ഷേത്ര പരിസരം സന്ദര്ശിച്ച് സുരക്ഷാക്രമീകരണങ്ങള് വിലയിരുത്തി.
