കോഴിക്കോട്: വയനാട് സ്വദേശിനിയായ യുവതിയെ റെയിൽവേ പാളത്തിൽ നിന്നും മരിച്ച നിലയിൽ കണ്ടെത്തി. കൽപ്പറ്റ സ്വദേശിനി ഐശ്വര്യ ജോസഫിനെയാണ് മരിച്ച നിലയിൽ കണ്ടെത്തിയത്. നേത്രാവതി എക്സ്പ്രസിൽ നിന്ന് വീണതാകാമെന്നാണ് പ്രാഥമിക നിഗമനം.
കാസർകോഡ് പള്ളിക്കര മാസ്തിഗുഡ്ഡ റെയിൽവേ ഗേറ്റിൽ നിന്ന് 200 മീറ്റർ മാറി യുവതിയെ പാളത്തിൽ വീണ് കിടക്കുന്ന നിലയിൽ കണ്ടെത്തുകയായിരുന്നു. വെള്ളിയാഴ്ച രാത്രി ഒമ്പത് മണിക്ക് ശേഷമായിരുന്നു അപകടം.
നേത്രാവതി എക്സ്പ്രസ് കടന്നു പോയതിന് പിന്നാലെ ട്രെയിനിൽ നിന്നും ഒരാൾ വീണിട്ടുണ്ടെന്ന് കാസർകോട് പോലീസ് രാത്രി പത്ത് മണിയോടെ ബേക്കൽ പോലീസിനെ വിവരം അറിയിച്ചിരുന്നു. തുടർന്ന് നടത്തിയ അന്വേഷണത്തിലാണ് പാളങ്ങൾക്കിടയിൽ വീണ് കിടക്കുന്ന നിലയിൽ യുവതിയെ കണ്ടെത്തിയത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
