ഇടുക്കി : വണ്ടിപ്പെരിയാറില് ബലാത്സംഗം ചെയ്ത് കൊലപ്പെടുത്തിയ പെണ്കുട്ടിയുടെ പിതാവിന് കുത്തേറ്റു. വണ്ടിപ്പെരിയാര് ടൗണില് വച്ചാണ് കുത്തേറ്റത്. പരിക്ക് ഗുരുതരമല്ലെന്നാണ് ലഭിക്കുന്ന വിവരം. കേസിലെ പ്രതി അര്ജുന്റെ ബന്ധുവാണ് കുത്തിയതെന്നാണ് സംശയം.
വണ്ടിപ്പെരിയാറില് ആറ് വയസുകാരിയെ ബലാത്സംഗം ചെയ്ത് കൊലപ്പെടുത്തിയ കേസില് തെളിവുകളും അഭാവത്തില് പ്രതി അര്ജുനെ കോടതി വെറുതെ വിട്ടിരുന്നു. 2021 ജൂണ് മുപ്പതിനാണ് വണ്ടിപ്പെരിയാര് ചുരക്കുളം എസ്റ്റേറ്റ് ലയത്തില് 6 വയസുകാരിയെ കഴുത്തില് ഷാള് കുരുക്കി കൊല ചെയ്യപ്പെട്ട നിലയില് കണ്ടെത്തിയത്. കുട്ടി പീഡനത്തിന് ഇരയായതായി തുടര്ന്ന് നടത്തിയ മെഡിക്കല് പരിശോധനയിലാണ് വ്യക്തമായത്.
പിന്നീട് നടത്തിയ അന്വേഷണത്തിലാണ് വണ്ടിപ്പെരിയാര് സ്വദേശി അര്ജുനാണ് കൃത്യം ചെയ്തതെന്ന് പോലീസ് കണ്ടെത്തിയത്. എന്നാല് കേസ് കോടതിയില് എത്തിയെങ്കിലും അര്ജുനെതിരെ പോലീസ് ചുമത്തിയ ബലാത്സംഗം, കൊലപാതകം ഉള്പ്പടെ ഒരു കുറ്റവും പ്രോസിക്യൂഷന് കോടതിയില് തെളിയിക്കാനായില്ല.
