ന്യൂദല്ഹി: ജമ്മു കശ്മീരിലെ ഭീകരസംഘടനയായ തെഹ്രീക് ഇ ഹുറിയത്തിനെ നിരോധിച്ച് കേന്ദ്ര സര്ക്കാര്. ഭീകര പ്രവര്ത്തനങ്ങളുടെ പേരില് ഈ സംഘടനയെ യുഎപിഎ പ്രകാരം നിരോധിച്ചതായി കേന്ദ്ര ആഭ്യന്തര മന്ത്രി അമിത് ഷായാണ് പ്രഖ്യാപിച്ചത്. ജമ്മു കശ്മീരിനെ ഭീകരതയില് നിന്ന് മോചിപ്പിക്കാന് കേന്ദ്രസര്ക്കാര് തുടര്ച്ചയായി സ്വീകരിക്കുന്ന നടപടികളുടെ ഭാഗമായാണ് തീരുമാനം. നേരത്തെ മുസ്ലിം ലീഗ് ജമ്മു കശ്മീരിനെ (മസ്രത്ത് ആലം ഗ്രൂപ്പ്) കേന്ദ്രം നിരോധിച്ചിരുന്നു.
എക്സിലൂടെയാണ് അമിത് ഷാ പ്രഖ്യാപനം നടത്തിയത്. തെഹ്രീക് ഇ ഹുറിയത്ത്, ജമ്മു കശ്മീരിനെ യുഎപിഎ പ്രകാരം നിയമവിരുദ്ധമായ സംഘടനയായി പ്രഖ്യാപിക്കുന്നു. ജമ്മു കശ്മീരിനെ ഭാരതത്തില് നിന്ന് വേര്പെടുത്താനും ഇസ്ലാമിക ഭരണം സ്ഥാപിക്കാനുമുള്ള പ്രവര്ത്തനങ്ങളിലാണ് സംഘടന ഏര്പ്പെട്ടിരിക്കുന്നത്. വിഘടനവാദം പ്രോത്സാഹിപ്പിക്കുന്നതിനായി ഇവര് ഭാരത വിരുദ്ധ പ്രചരണങ്ങള് നടത്തുകയും ഭീകരപ്രവര്ത്തനങ്ങള് തുടരുകയും ചെയ്യുകയാണെന്ന് അമിത് ഷാ കുറിച്ചു. ഭീകരതയ്ക്കെതിരായ പ്രധാനമന്ത്രി നരേന്ദ്ര മോദിയുടെ വിട്ടുവീഴ്ചയില്ലാത്ത നയം, ഭാരത വിരുദ്ധ പ്രവര്ത്തനങ്ങളില് ഏര്പ്പെട്ടിരിക്കുന്ന ഏതൊരു വ്യക്തിയേയും സംഘടനയേയും ഉടന് തന്നെ പരാജയപ്പെടുത്തുമെന്നും അമിത് ഷാ വ്യക്തമാക്കി.
തെഹ്രീക് ഇ ഹുറിയത്തിനെ നിരോധിച്ചുള്ള വിജ്ഞാപനവും കേന്ദ്രം പുറത്തിറക്കിയിട്ടുണ്ട്. ഈ സംഘടനയിലുള്ളവര് ഭീകരര്ക്ക് ആദരാഞ്ജലി അര്പ്പിക്കുകയും കല്ലേറിനെ പ്രോത്സാഹിപ്പിക്കുകയും ചെയ്യുന്നു. ഇവര് നിയമം പാലിക്കുന്നില്ല. കാശ്മീരിനെ ഭാരതത്തില് നിന്ന് വേര്പെട്ട പ്രദേശമായി കണക്കാക്കുന്നു. കശ്മീരില് ഭീകര പ്രവര്ത്തനങ്ങള് പ്രോത്സാഹിപ്പിക്കുന്ന മറ്റൊരു വലിയ സംഘടനയ്ക്കെതിരെ നാല് ദിവസത്തിനുള്ളില് സര്ക്കാര് നടപടി സ്വീകരിച്ചെന്നും കേന്ദ്രത്തിന്റെ വിജ്ഞാപനത്തില് ചൂണ്ടിക്കാട്ടുന്നു.
