തൃശ്ശൂര്: ബിജെപിയില് മതന്യൂനപക്ഷങ്ങള് ചേരുന്നതില് അസഹിഷ്ണുതയോടെയാണ് സിപിഎമ്മും കോണ്ഗ്രസും പെരുമാറുന്നതെന്ന് ബിജെപി സംസ്ഥാന അധ്യക്ഷന് കെ. സുരേന്ദ്രന്. എന്നാല് ഇതിനെയൊക്കെ അതിജീവിച്ച് ന്യൂനപക്ഷങ്ങള് ബിജെപിയോട് അടുക്കുകയാണെന്നും മാധ്യമപ്രവര്ത്തകരോട് അദ്ദേഹം പറഞ്ഞു. പ്രധാനമന്ത്രി നരേന്ദ്ര മോദി തന്നെ നിര്ദേശിച്ച സ്നേഹയാത്ര മികച്ച രീതിയില് മുന്നോട്ട് പോവുകയാണ്.
ഇന്നലെ പത്തനംതിട്ടയില് വൈദികന് ഉള്പ്പെടെ ബിജെപിയില് ചേര്ന്നു. ബിജെപിയില് ചേര്ന്ന വൈദികനെയും സ്നേഹസംഗമത്തില് ആശംസ നേര്ന്ന വൈദികനെയും മോശമായ രീതിയിലാണ് കോണ്ഗ്രസും സിപിഎമ്മും അവഹേളിക്കുന്നത്. മോദിയുടെ തൃശ്ശൂര് സന്ദര്ശനം ചരിത്രം സൃഷ്ടിക്കും. അയോദ്ധ്യയിലെ രാമക്ഷേത്രത്തെ മതധ്രുവീകരണത്തിന് ഉപയോഗിക്കുകയാണ് കോണ്ഗ്രസും സിപിഎമ്മും. എന്നാല് വോട്ട് ബാങ്ക് രാഷ്ട്രീയത്തിന് അധികം ആയുസുണ്ടാവില്ലെന്ന് ഇവര് തിരിച്ചറിയണം.
ബിജെപി ഏറ്റവും പ്രഗല്ഭരായവരുടെ സ്ഥാനാര്ത്ഥി ലിസ്റ്റാവും പുറത്തിറക്കുക. യുഡിഎഫിലെ 19 എംപിമാരും നിര്ഗുണ പരബ്രഹ്മങ്ങളാണ്. എല്ഡിഎഫിന്റെ ആരിഫിനാണെങ്കില് പാര്ലമെന്റില് എഴുന്നേറ്റ് നിന്ന് സംസാരിക്കാന് പോലും സാധിക്കുന്നില്ല. 50 സീറ്റ് പോലും തികയ്ക്കാനാവാത്ത രാഹുല്ഗാന്ധിക്ക് വോട്ട് ചെയ്തത് കൊണ്ടോ ചിത്രത്തിലേ ഇല്ലാത്ത സിപിഎമ്മിന് വോട്ട് ചെയ്തത് കൊണ്ടോ കേരളത്തിലെ ജനങ്ങള്ക്ക് ഒരു ഗുണവും ഉണ്ടാകാന് പോവുന്നില്ല. ഹാട്രിക്ക് വിജയത്തിലേക്ക് പോവുന്ന നരേന്ദ്ര മോദി സര്ക്കാരില് പങ്കാളിത്തം ഉറപ്പിക്കാനാണ് മലയാളികള് ശ്രമിക്കേണ്ടത്. ജനങ്ങള്ക്ക് നല്ലത് ചെയ്യുന്നവര്ക്കാണ് വോട്ട് ചെയ്യേണ്ടത്. കേരളത്തിലും ദക്ഷിണേന്ത്യയിലും ബിജെപിയുടെ അടിത്തറ വര്ദ്ധിപ്പിക്കാന് നല്ല പരിശ്രമമുണ്ടാവുന്നുണ്ട്. ദക്ഷിണേന്ത്യന് സംസ്ഥാനങ്ങളില് വികസനം ഉറപ്പുവരുത്താന് മോദി ശ്രമിക്കുന്നു. എല്ലാ വിഭാഗം ജനങ്ങളെയും ചേര്ത്ത് പിടിച്ചാണ് കേന്ദ്രസര്ക്കാര് പോവുന്നതെന്നും സുരേന്ദ്രന് പറഞ്ഞു.
