തിരുവനന്തപുരം: തിരുവല്ലത്ത് യുവതി ജീവനൊടുക്കിയ കേസിൽ കൂടുതൽ ആരോപണങ്ങൾ ഉന്നയിച്ച് ബന്ധുക്കൾ. വണ്ടിത്തടം സ്വദേശി ഷഹ്നയാണ് ആത്മഹത്യ ചെയതത്. സംഭവത്തിന് പിന്നാലെ യുവതി ഭർതൃവീട്ടിൽ ക്രൂര പീഡനത്തിന് ഇരയായതായി ബന്ധുക്കൾ ആരോപണം ഉന്നയിച്ചു. ഇതിന് പിന്നാലെയാണ് ഷഹ്നയുടെ മുഖത്തും കൈക്കും പരിക്കേറ്റതിന്റെ ചിത്രങ്ങൾ പുറത്തു വ്ന്നിരിക്കുന്നത്.
തിരുവനന്തപുരം അനന്തപുരി ആശുപത്രിയിൽ സൂക്ഷിച്ചിരുന്ന ഷഹ്നയുടെ മൃതദേഹം ഇന്ന് പോസ്റ്റ്മോർട്ടം ചെയ്യും. ഭർതൃമാതാവ് ഷഹ്നയെ നിരന്തരം പീഡിപ്പിച്ചിരുന്നു. തിരുവല്ലം പോലീസ് ബന്ധുക്കളുടെ മൊഴി രേഖപ്പെടുത്തി. കല്യാണ ശേഷം എട്ടാം മാസം മുതൽ യുവതിയ്ക്ക് മർദ്ദനമേറ്റിരുന്നതായി ബന്ധുക്കൾ പറയുന്നു.
ഗർഭിണി ആയിരുന്നതിനാലാണ് വിവാഹമോചനത്തിന് ശ്രമിക്കാതിരുന്നതെന്നും കുടുംബം പറഞ്ഞു. ഭർതൃവീട്ടിലെ പ്രശ്നങ്ങളെ തുടർന്ന് മൂന്ന് മാസത്തോളമായി യുവതി സ്വന്തം വീട്ടിലായിരുന്നു. ഇന്നലെ ഭർതൃവീട്ടിൽ നടന്ന സ്വകാര്യ ചടങ്ങിൽ പങ്കെടുക്കണമെന്ന് ഭർത്താവ് ആവശ്യപ്പെട്ടിരുന്നു. എന്നാൽ, ഷഹന പോകാൻ തയ്യാറായില്ല. തുടർന്ന് ഭർത്താവ് നൗഫൽ യുവതിയുടെ വീട്ടിലെത്തി ഒന്നര വയസുള്ള കുഞ്ഞിനെ ബലമായി വീട്ടിലേക്ക് കൊണ്ടുപോയി. ഇതിന് പിന്നാലെ യുവതി മുറിയിൽ കയറി കതകടച്ചു. പിന്നീട് നടത്തിയ പരിശോധനയിലാണ് മരിച്ച നിലയിൽ കണ്ടെത്തിയത്.
