തിരുവനന്തപുരം: പിണറായിയെക്കുറിച്ച് 24ന്യൂസിന്റെ ഹാഷ്മി പറഞ്ഞത് ഇങ്ങിനെ: “മഹാരാജാവേ നിങ്ങള് പട്ടാപ്പകലും നഗ്നനാണ്”. നവകേരളാ യാത്ര കോടികള് മുടക്കിയുള്ള ഒരു രാജാവെഴുന്നെള്ളിപ്പ് യാത്രയാണെന്നും ഹാഷ്മി വിശേഷിപ്പിക്കുന്നു. കാസര്കോഡ് മുതല് തിരുവനന്തപുരം വരെ വിജോയിക്കുന്നവന്റെ മണ്ടയടിച്ചു തകര്ക്കുന്ന ഗുണ്ടാസംഘങ്ങളാണ് ഈ യാത്രയുടെ മറവില് വിലസിയതെന്നും ഹാഷ്മി. കമ്മ്യൂണിസം തരിമ്പ് ഹൃദയത്തിലുള്ളവന് പിണറായിയുടെ വാഴ്ത്തുപാട്ട് കേള്ക്കുമ്പോള് ഓക്കാനമാണ് വരുന്നതെന്നും ഹാഷ്മി. ഇന്നലെ വരെ ആര്ക്കുവേണ്ടിയാണോ അടിമപ്പണി ചെയ്തത് അവര്ക്കെതിരെ ഇന്ന് എന്തിനാണ് ഹാഷ്മി ഇങ്ങിനെ ഉറഞ്ഞുതുള്ളുന്നതെന്നോ? നവകേരളാബസിന് നേരെ യൂത്ത് കോണ്ഗ്രസുകാര് ചെരിപ്പെറിഞ്ഞ കേസില് 24ന്യൂസിന്റെ വനിതാ റിപ്പോര്ട്ടര് വിനീതയ്ക്കെതിരെ ക്രിമിനല് ഗൂഡാലോചനയ്ക്ക് മുഖ്യമന്ത്രി കേസെടുത്തതോടെ ശ്രീകണ്ഠന്നായരുടെ ചാനലും മുഖ്യമന്ത്രിയും തമ്മില് പരസ്യപ്പോര് മൂര്ച്ഛിച്ചത്. .
ഒരു കാലത്ത് പിണറായിക്കും സിപിഎമ്മിനും വേണ്ടി അഹോരാത്രം പണിയെടുത്ത ചാനലാണ് 24ന്യുൂസ്. അതിന്റെ എഡിറ്റര് ശ്രീകണ്ഠന്നായരും പിണറായിയുടെ പിന്തുണയില് അഹങ്കരിച്ചുനടന്ന ആളാണ്. ശബരിമല വിവാദമുണ്ടായപ്പോള് കള്ള ചെമ്പോല കാണിച്ച് പണ്ട് ശബരിമലയുടെ ഉടമസ്ഥാവകാശം അരയന്മാര്ക്കാണെന്ന് വരെ മുഖ്യമന്ത്രിക്ക് വേണ്ടി കള്ളക്കഥ ചമച്ച ചാനലാണ് 24 ന്യൂസും ശ്രീകണ്ഠന്നായരും. ക്രിമിനല് ഗൂഢാലോചന എന്നൊക്കെ പറഞ്ഞ് മൂക്കില് കയറ്റാന് നോക്കിയാല് നടക്കില്ലെന്നും റിപ്പോര്ട്ടറെ ചേര്ത്ത് പിടിക്കാന് തങ്ങള്ക്ക് കഴിയുമെന്നും ഹാഷ്മി പിണറായിയെയും സഖാക്കളേയും വെല്ലുവിളിക്കുന്നു.
ഇപ്പോള് നവകേരളാബസിന് നേരെ ചെരിപ്പെറിഞ്ഞ കേസില് 24ന്യൂസിന്റെ റിപ്പോര്ട്ടര് വിനീതയ്ക്കെതിരെ ക്രിമിനല് ഗൂഢാലോചനയ്ക്ക് പിണറായി പ്പൊലീസ് കേസെടുത്തതോടെ ശ്രീകണ്ഠന്നായരും പിണറായിയും തമ്മില് ഉടക്കിലാണ്. സിപിഎമ്മുകാരും 24ന്യൂസും തമ്മില് വന് അടിയുമാണ്. പിണറായിയെ വെല്ലുവിളിക്കുന്ന പരിപാടിയായിരുന്നു കഴിഞ്ഞ ദിവസം 24ന്യൂസ് ചാനലിന്റെ ഹാഷ്മിയുടേത്. പൂച്ച പെറ്റ് പൂത്ത് കിടന്ന ഖജനാവിന് ഒരു റീത്തുംവെച്ച് നാടുചുറ്റാനിറങ്ങിയതാണ് നവകേരളാസദസ്സുമായി പിണറായിയും മന്ത്രിസംഘവുമെന്നാണ് ഹാഷ്മി പിണറായി സര്ക്കാരിനെ വിമര്ശിച്ചുകൊണ്ട് പറഞ്ഞത്. രാഷ്ട്രീയ ധൂര്ത്തയാത്ര എന്നാണ് ഹാഷ്മി നവകേരളായാത്രയെ വിശേഷിപ്പിക്കുന്നത്. പട്ടിണിപ്പാവങ്ങള്ക്ക് മാസപ്പെന്ഷന് കൊടുക്കാതെ അണ്ടിപ്പരിപ്പ് പാലില് കുതിര്ത്തും കോഴിയും താറാവും മട്ടനും അപ്പാസും ഉരുട്ടിവിഴുങ്ങുന്ന പ്രഭാതവിരുന്നുകളായിരുന്നു നവകേരളായാത്രയില് മുഖ്യമന്ത്രിയുടേതെന്നും ഹാഷ്മി തുറന്നടിക്കുന്നു. ഇതിനെതിരെ സൈബര് സഖാക്കള് ശ്രീകണ്ഠന്നായരേയും വിനീതയേയും ഹാഷ്മിയേയും എടുത്തിട്ട് അലക്കുകയാണ്. വിനീത നടത്തിയത് ക്രിമിനല് ഗൂഢാലോചനയാണെന്നും ഗൂഢാലോചനയെ ഗൂഢാലോചനയെന്നേ വിളിക്കൂ എന്നും പിണറായി വാര്ത്താസമ്മേളനത്തില് തീര്ത്തുപറഞ്ഞതോടെ ശ്രീകണ്ഠന്നായരുടെ മുഖം നഷ്ടപ്പെട്ട അവസ്ഥയാണ്.
മുട്ടില്മരം മുറിക്കേസിലെ പ്രതികളായ അഗസ്റ്റിന് സഹോദരന്മാര് റിപ്പോര്ട്ടര് ചാനല് തുടങ്ങിയതോടെ പിണറായിക്കും സിപിഎമ്മിനും സ്വന്തം ചാനല് എന്ന പ്രേമം റിപ്പോര്ട്ടറിനോടാണ്. സഖാക്കളായ നികേഷും മൊട്ട അരുണ് എന്ന ഡോ. അരുണ്കുമാറും അവിടെ പിണറായി താല്പര്യം സംരക്ഷിക്കാന് കട്ടയ്ക്ക് നിലകൊള്ളുന്നതോടെ ശ്രീകണ്ഠന്നായരും സ്വതവേ പിറകിലായ 24 ന്യൂസിനോട് പിണറായിക്ക് വലിയ താല്പര്യം ഒട്ടും ഇല്ലാതായിക്കഴിഞ്ഞു. ശ്രീകണ്ഠന്നായര് എത്രയൊക്കെ അട്ടഹസിച്ചിട്ടും പിണറായി 24ന്യൂസിന്റെ വനിതാറിപ്പോര്ട്ടര്ക്കെതിരായ ക്രിമിനല് ഗൂഢാലോചനക്കേസ് പിന്വലിക്കില്ലെന്ന നിലപാടിലാണ്.
