ഭൂവനേശ്വര്: ബീഫ് തിന്നുന്ന വീഡിയോയിലൂടെ ലക്ഷക്കണക്കിന് ഫോളോവേഴ്സിനെ നേടിയ ഇന്ഫ്ളൂവന്സറായ കാമിയ ജാനി ഒഡിഷയിലെ പുരി ജഗന്നാഥക്ഷേത്രത്തിലെ പൂജാപ്രസാദങ്ങളെ പുകഴ്ത്തുന്ന വീഡിയോ ചെയ്യാനെത്തിയതില് ബിജെപിയ്ക്ക് കടുത്ത പ്രതിഷേധം. ബീഫ് കഴിക്കുന്നതിനെ പ്രോത്സാഹിപ്പിക്കുന്ന വ്യക്തിയെന്ന നിലയില് അറിയപ്പെടുന്ന കാമിയ ജാനി ജഗന്നാഥ ക്ഷേത്രത്തിലെ മഹാപ്രസാദത്തെക്കുറിച്ച് പ്രകീര്ത്തിച്ചുകൊണ്ട് വീഡിയോയില് പറയുന്നതിലെ വൈരുദ്ധ്യമാണ് ബിജെപിയെ പ്രകോപിപ്പിച്ചത്. പുരിശ്രീമന്ദിറിനെ പൈതൃക ഇടനാഴി ടൂറിസത്തില് പെടുത്തിയതിനെയും കാമിയ ജാനി പുതിയ വീഡിയോയില് പുകഴ്ത്തി സംസാരിക്കുന്നതും ബിജെപി പ്രവര്ത്തകരെ പ്രകോപിപ്പിക്കുന്നു. .
കാമിയ ജാനിയെയും അവരുടെ കൂടെ പുരി ജഗന്നാഥക്ഷേത്രത്തില് എത്തിയ വി.കെ. പാണ്ഡ്യനേയും അറസ്റ്റ് ചെയ്യണമെന്ന് ബിജെപി നേതാക്കള് ആവശ്യപ്പെടുന്നത്. ഇന്ത്യാശിക്ഷാനിയമം 295എ പ്രകാരം ഈ രണ്ടുപേരെയും അറസ്റ്റ് ചെയ്യണമെന്നതാണ് ആവശ്യം.. ഇതിന് തൊട്ടുമുമ്പുള്ള കാമിയ ജാനിയുടെ വീഡിയോ ചില ബീഫ് കറികളെ പരിചയപ്പെടുത്തിക്കൊണ്ടുള്ളതായിരുന്നു. ഇതിന്റെ ഫോട്ടോയും ക്ഷേത്രത്തിലെ പ്രസാദത്തെ പ്രകീര്ത്തിച്ചുപറയുന്ന ഫോട്ടോയും അടുത്തടുത്ത് വെച്ചാണ് ബിജെപി കാമിയ ജാനിയ്ക്കെതിരെ പ്രചാരണം സമൂഹമാധ്യമങ്ങളില് അഴിച്ചുവിടുന്നത്.
ബീഫ് തിന്നുന്നതിനെ പ്രോത്സാഹിപ്പിക്കുന്ന ഒരാളെ ക്ഷേത്രത്തില് കയറ്റിയത് മൂലം ചരിത്രപരവും ആത്മീയവുമായ പാരമ്പര്യമുള്ള പുരി ജഗന്നാഥക്ഷേത്രത്തിന്റെ വിശുദ്ധിയാണ് ബിജെഡി നേതാവ് വി.കെ. പാണ്ഡ്യന് കളങ്കപ്പെടുത്തിയതെന്നും ഇതിന് ഒഡിയയിലെ ജനങ്ങള് പകരം വീട്ടിക്കൊള്ളുമെന്നും ബിജെപി പറയുന്നു.
