തിരുവനന്തപുരം: 91-ാമത് ശിവഗിരി തീര്‍ത്ഥാടനം 30ന് ആരംഭിച്ച് ജനുവരി ഒന്നിന് സമാപിക്കും. തീര്‍ത്ഥാടനത്തിന്റെ ഉദ്ഘാടനം മുഖ്യമന്ത്രി പിണറായി വിജയനും തീര്‍ത്ഥാടന മഹാസമ്മേളനം കേന്ദ്രധനകാര്യ മന്ത്രി നിര്‍മലാ സീതാരാമനും നിര്‍വ്വഹിക്കും.
30ന് രാവിലെ 7.30ന് ധര്‍മ്മ സംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ ധര്‍മ്മപതാക ഉയര്‍ത്തുന്നതോടെ സമ്മേളനത്തിന് തുടക്കമാകും. 10 മണിക്ക് ശിവഗിരി തീര്‍ത്ഥാടനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ധര്‍മ്മ സംഘം ട്രസ്റ്റ് പ്രസിഡന്റ് സച്ചിദാനന്ദസ്വാമി അധ്യക്ഷത വഹിക്കും.
ശ്രീനാരായണ ധര്‍മ്മസംഘം ട്രസ്റ്റ് മുന്‍ പ്രസിഡന്റ് വിശുദ്ധാനന്ദ സ്വാമി, ട്രഷറര്‍ ശാരദാനന്ദ സ്വാമി, തീര്‍ത്ഥാടന കമ്മിറ്റി സെക്രട്ടറി ഋതംഭരാനന്ദ സ്വാമി, മന്ത്രി വി.എന്‍. വാസവന്‍, എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍, രമേശ് ചെന്നിത്തല എംഎല്‍എ, അഡ്വ.വി.ജോയി എംഎല്‍എ, റെയില്‍വെ പാസഞ്ചേഴ്‌സ് അമിനിറ്റീസ് കമ്മിറ്റി മുന്‍ ചെയര്‍മാന്‍ പി.കെ. കൃഷ്ണദാസ് തുടങ്ങിയവര്‍ പങ്കെടുക്കും. ഉച്ചയ്‌ക്ക് 2ന് സാങ്കേതിക ശാസ്ത്ര സമ്മേളനം ഐഎസ്ആര്‍ഒ ചെയര്‍മാന്‍ എസ്. സോമനാഥ് ഉദ്ഘാടനം ചെയ്യും. ഡിജിറ്റല്‍ സര്‍വകലാശാല വൈസ് ചാന്‍സലര്‍ ഡോ.സജി ഗോപിനാഥ് അദ്ധ്യക്ഷത വഹിക്കും.
വൈകിട്ട് 5ന് വിദ്യാഭ്യാസ സമ്മേളനം കര്‍ണ്ണാടക വിദ്യാഭ്യാസ മന്ത്രി മധു ബംഗാരപ്പ ഉദ്ഘാടനം ചെയ്യും. മന്ത്രി പി.രാജീവ് അദ്ധ്യക്ഷത വഹിക്കും. എന്‍.കെ. പ്രേമചന്ദ്രന്‍ എംപി മുഖ്യാതിഥിയാകും. രാത്രി 7ന് കലാപരിപാടികളുടെ ഉദ്ഘാടനം നടന്‍ ദേവന്‍ നിര്‍വഹിക്കും.
31ന് രാവിലെ അഞ്ചിന് ശിവഗിരി തീര്‍ത്ഥാടന ഘോഷയാത്ര സന്ന്യാസി ശ്രേഷ്ഠരുടെ നേതൃത്വത്തില്‍ മഹാസമാധിയില്‍ നിന്നും പുറപ്പെടും. തീര്‍ത്ഥാടന മഹാസമ്മേളനം രാവിലെ 10ന് കേന്ദ്ര ധനകാര്യമന്ത്രി നിര്‍മലാ സീതാരാമന്‍ ഉദ്ഘാടനം ചെയ്യും. ശ്രീനാരായണ ധര്‍മ്മ സംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ അദ്ധ്യക്ഷത വഹിക്കുന്ന യോഗത്തില്‍ കേന്ദ്ര മന്ത്രി വി.മുരളീധരന്‍, ലുലു ഗ്രൂപ്പ് ഓഫ് കമ്പനീസ് സിഎംഡി എം.എ. യൂസഫലി എന്നിവര്‍ വിശിഷ്ടാതിഥികളാകും. അടൂര്‍ പ്രകാശ് എംപി, കടകംപള്ളി സുരേന്ദ്രന്‍ എംഎല്‍എ തുടങ്ങിയവര്‍ പങ്കെടുക്കും.
31ന് രാത്രി 12 മണിക്ക് ഗുരുദേവ സമാധിയില്‍ പുതുവത്സര പൂജയും സമൂഹപ്രാര്‍ത്ഥനയും നടക്കും. മഹാസമാധി മന്ദിരത്തിലെ ഗുരുദേവപ്രതിമാ പ്രതിഷ്ഠാദിനം പ്രമാണിച്ച് ജനുവരി ഒന്നിന്‌രാവിലെ എട്ടിന് ശാരദാമഠത്തില്‍ നിന്നും മഹാസമാധി മന്ദിരത്തിലേക്ക് 108 പുഷ്പ കലശ പ്രയാണം നടക്കും. വൈകിട്ട് അഞ്ചിന് സമാപന സമ്മേളനം മന്ത്രി കെ.എന്‍. ബാലഗോപാല്‍ ഉദ്ഘാടനം ചെയ്യും. വിവിധ സമ്മേളനങ്ങള്‍ മന്ത്രിമാരായ പി.എ. മുഹമ്മദ് റിയാസ്, വീണാ ജോര്‍ജ്ജ്, സജി ചെറിയാന്‍ തുടങ്ങിയവര്‍ ഉദ്ഘാടനം ചെയ്യും. എംപി മാരായ ശശിതരൂര്‍, കൊടിക്കുന്നില്‍ സുരേഷ് , ബിനോയ് വിശ്വം, കെ.സി. വേണുഗോപാല്‍, എ.എ. റഹിം, കെ. സുധാകരന്‍, ജോസ് കെ. മാണി, എംഎല്‍എമാരായ കെ. ബാബു, ഡി.കെ. മുരളി, കെ.ബാബു, വാഴൂര്‍ സോമന്‍, വി.കെ. പ്രശാന്ത്, ചാണ്ടി ഉമ്മന്‍, കെ.കെ. ശൈലജ തുടങ്ങിയവര്‍ സംബന്ധിക്കും.
ശിവഗിരി തീര്‍ത്ഥാടനത്തിന് മുന്നോടിയായി 26ന് രാവിലെ 10ന് നടക്കുന്ന സര്‍വ്വമതസമ്മേളന ശതാബ്ദിയാഘോഷം മുന്‍രാഷ്‌ട്രപതി രാംനാഥ്‌കോവിന്ദ് ഉദ്ഘാടനം ചെയ്യും. ഗവര്‍ണര്‍ ആരിഫ് മുഹമ്മദ് ഖാന്‍ മുഖ്യാതിഥിയാകും.
27ന് നടക്കുന്ന ഗുരുധര്‍മ്മ പ്രചരണസഭാസമ്മേളനം രാവിലെ 10ന് സുപ്രീംകോടതി നാഷണല്‍ ജുഡീഷ്യല്‍ അക്കാദമി മുന്‍ ഡയറക്ടര്‍ ഡോ.ജി.മോഹന്‍ഗോപാല്‍ ഉദ്ഘാടനം ചെയ്യും. 28ന് കുമാരനാശാന്‍ ദേഹവിയോഗ ശതാബ്ദിയാചരണം രാവിലെ 10ന് മന്ത്രി എം.ബി.രാജേഷ് ഉദ്ഘാടനം നിര്‍വ്വഹിക്കും. 29ന് ശിവഗിരി ഹൈസ്‌ക്കൂള്‍ ശതാബ്ദിയാഘോഷ സമ്മേളനം രാവിലെ 10ന് മന്ത്രി വി.ശിവന്‍കുട്ടി ഉദ്ഘാടനം ചെയ്യും.
പ്രതികരിക്കാൻ ഇവിടെ എഴുതുക: