കോട്ടയം: വൈക്കത്ത് സ്വകാര്യ കമ്പനിയുടെ ഓഫീസിൽ കയറി ഒപ്പിട്ട ചെക്ക് ലീഫുകൾ മോഷ്ടിച്ച കേസിൽ യുവാവ് അറസ്റ്റിൽ. തകഴി സ്വദേശി ഡെന്നിസ് എന്ന 21-കാരനെയാണ് പോലീസ് അറസ്റ്റ് ചെയ്തത്. മോഷ്ടിച്ച ചെക്ക് ലീഫ് ഉപയോഗിച്ച് പ്രതി പണം പിൻവലിച്ചിരുന്നു.
ഈ കഴിഞ്ഞ ഏഴാം തീയതി രാത്രിയാണ് കേസിന് ആസ്പദമായ സംഭവം. വൈക്കം ചാലപറമ്പ് ഭാഗത്ത് പ്രവർത്തിക്കുന്ന സ്വകാര്യ കമ്പനിയുടെ ഓഫീസിന്റെ പൂട്ട് തകർത്ത് യുവാവ് അകത്ത് കയറി. അലമാരയിൽ സൂക്ഷിച്ചു വച്ചിരുന്ന ചെക്ക് ലീഫുകൾ മോഷ്ടിച്ച് കടന്നു കളയുകയായിരുന്നു.
ഇവ ഉപയോഗിച്ച് പ്രതി ബാങ്കിൽ നിന്നും പണം പിൻവലിച്ചിരുന്നു. അക്കൗണ്ടിൽ നിന്നും പണം നഷ്ടമായതിന് പിന്നാലെ ഉടമ പരാതി നൽകി. ഇതേ തുടർന്ന് നടത്തിയ ശാസ്ത്രീയ പരിശോധനയിലാണ് യുവാവ് പിടിയിലായത്.
