സിനിമയുടെ പുറകെ ഒരുപാട് സഞ്ചരിച്ച ആളാണ് ഞാൻ. ആദ്യമൊക്കെ ചെറിയ ചെറിയ അവസരങ്ങളാണ് ലഭിച്ചത്. നല്ലൊരു സിനിമ ഇറങ്ങുക, അത് പ്രേക്ഷകരിൽ ശ്രദ്ധിക്കപ്പെടുക എന്നതൊക്കെ കാണുമ്പോൾ സന്തോഷമുണ്ട്. അഞ്ച് ആറ് തവണ ഐഎഫ്ഐഫ്കെയിൽ പങ്കെടുത്തിട്ടുണ്ട്. അന്നൊന്നും ആളുകൾ എന്നെ തിരിച്ചറിഞ്ഞിട്ടില്ല. ഇപ്പോൾ ഒരുപാട് പേർ എന്നെ തിരിച്ചറിയുന്നതിന് കാരണം കാതലാണ്.
മമ്മൂട്ടിയ്ക്കൊപ്പം കോമ്പിനേഷൻ സീൻ അങ്ങനെയില്ല.. ജിയോ ബേബിയ്ക്ക് ഞാൻ ഈ കഥാപാത്രം ചെയ്യണമെന്ന് വലിയ താല്പര്യം ആയിരുന്നു. എന്നാൽ മമ്മൂക്കയ്ക്ക് ഇഷ്ടപ്പെടുമോ എന്ന ഭയമുണ്ടായിരുന്നു. മമ്മൂക്ക ഹാപ്പിയാണെന്ന് അവസാനം അറിഞ്ഞപ്പോൾ ഭയങ്കര സന്തോഷമുണ്ട്. അതുപോലെ തന്നെ ചിത്രത്തിന്റെ ഇന്റർവെൽ സീൽ നല്ലതുപോലെ ടെൻഷൻ അടിച്ച് ചെയ്ത സീൻ ആയിരുന്നു. പ്രണയാർദ്രമായ നോട്ടം കൊണ്ടുപോലും ആ സിനിമയിൽ അത് പറഞ്ഞു വയ്ക്കുന്നുണ്ട്. അതുകൊണ്ട് തന്നെ ഒരു ഇന്റിമസി സീൻ വേണമെന്ന ആവശ്യം ഉള്ളതായി തോന്നിയില്ല.
ഏഴാം ക്ലാസ്സിൽ പഠിക്കുന്ന മോൻ ചോദിച്ചത് അച്ഛൻ ഒരു ഗേ ആണോ എന്നാണ്. ഞാൻ അവനോട് ഗേ എന്ന് പറഞ്ഞാൽ എന്താണെന്ന് അറിയോ എന്ന് ചോദിച്ചു. ആ എനിക്ക് അറിയാം എന്ന് അവൻ പറഞ്ഞു. ഞാൻ അന്ന് കൊച്ചിയിലായിരുന്നു, അവനോട് അച്ഛൻ വരട്ടെ കൂടുതൽ പറഞ്ഞു മനസിലാക്കി തരാം എന്നാണ് പറഞ്ഞത്. അങ്ങനെ കാര്യങ്ങൾ ഞാനവന് പറഞ്ഞു കൊടുത്തു. നമ്മൾ കുട്ടികളെ എഡ്യൂക്കേറ്റ് ചെയ്യണം എന്നാണ് എനിക്കും തോന്നുന്നത്. കുട്ടികൾ ഇതൊക്കെ മനസിലാക്കണം. ഭാര്യയ്ക്ക് സിനിമ നന്നായിട്ട് ഇഷ്ടപ്പെട്ടു എന്ന് പറഞ്ഞു.
