കോട്ടയം/ തൊടുപുഴ: തിരുച്ചിറപ്പള്ളിക്ക് സമീപം കാര് നിയന്ത്രണം വിട്ട് പുഴയിലേക്ക് മറിഞ്ഞ് നവദമ്പതികള് മരിച്ചു. ഇടുക്കി നെടുങ്കണ്ടം കരുണാപുരം മാവറയില് ശ്രീനാഥ് (36), ഭാര്യ കോട്ടയം കൂരോപ്പട മൂങ്ങാക്കുഴിയില് സന്തോഷ് ഭവനില് ആരതി എസ്. (25) എന്നിവരാണ് മരിച്ചത്.
തിരുച്ചിറപ്പള്ളി – ചെന്നൈ ദേശീയപാതയില് ശ്രീരംഗം ടോള് ഗേറ്റിന് സമീപം ഇന്നലെ പുലര്ച്ചെയായിരുന്നു അപകടം. നിയന്ത്രണം വിട്ട കാര് പാലത്തിന്റെ കൈവരി തകര്ത്ത് 50 അടി താഴ്ചയിലേക്ക് വീഴുകയായിരുന്നു. പുഴയില് വെള്ളം ഇല്ലാത്ത ഭാഗത്തേക്ക് വീണ കാര് പൂര്ണമായും തകര്ന്നു ചെന്നൈ എല് & ടി കമ്പനിയില് ജീവനക്കാരനായിരുന്നു ശ്രീനാഥ്. ശ്രീനാഥ് വ്യാഴാഴ്ചയാണ് ആരതിയുമായി കൂരോപ്പടയിലെ വീട്ടില് നിന്ന് പുറപ്പെട്ടത്. കഴിഞ്ഞ ഒക്ടോ. 18 നായിരുന്നു ഇവരുടെ വിവാഹം.
സന്തോഷ് കുമാറിന്റെയും സുജാ സന്തോഷിന്റെയും മകളാണ് ആരതി. ശ്രീനാഥ് ശശിധരന് നായരുടെയും ഓമനയുടെയും മകനാണ്.
മൃതദേഹങ്ങള് പോസ്റ്റ്മോര്ട്ടത്തിനായി ശ്രീരംഗം സര്ക്കാര് ആശുപത്രിയിലേക്ക് മാറ്റി. സംഭവത്തില് ശ്രീരംഗം പോലീസ് കേസെടുത്തു അന്വേഷണം ആരംഭിച്ചു.
