കൊച്ചി: ദുബായ്‌യിലെ ബാങ്കില്‍ നിന്ന് കോടികള്‍ തട്ടിയെടുത്തെന്ന കേസില്‍ മലയാളി വ്യവസായിയെ ഇ ഡി കസ്റ്റഡിയിലെടുത്തു.
കാസര്‍കോട് സ്വദേശിയായ അബ്ദുള്‍ റഹ്മാനെയാണ് 300 കോടി രൂപ തട്ടിയെടുത്ത കേസില്‍ കൊച്ചിയിലെ ഹോട്ടലില്‍നിന്ന് ഇന്നലെ രാവിലെ കസ്റ്റഡിയിലെടുത്തത്. ഇയാളെ കൊച്ചിയിലെ ഇ ഡി ഓഫീസിലെത്തിച്ച് ഉദ്യോഗസ്ഥര്‍ ചോദ്യംചെയ്തു വരികയാണ്. ഇയാളുടെ ഉടമസ്ഥതയിലുള്ള 25ഓളം സ്ഥലങ്ങളിലും ഇ ഡി റെയ്ഡ് നടത്തുന്നു.
2017-18 കാലയളവില്‍ 300 കോടിയോളം രൂപ ദുബായ്‌യിലെ വിവിധ ബാങ്കുകളെ കബളിപ്പിച്ച് അബ്ദുള്‍ റഹ്മാന്‍ തട്ടിയെടുത്തെന്നാണ് കേസ്. ഭീമമായ ഈ പണം കേരളത്തിലെ വിവിധമേഖലകളിലായി ഇയാള്‍ നിക്ഷേപിച്ചിട്ടുണ്ടെന്നും ഇ ഡി കണ്ടെത്തിയിട്ടുണ്ട്.
റിയല്‍ എസ്റ്റേറ്റ്, സിനിമ അടക്കമുള്ള വ്യവസായങ്ങളിലാണ് അബ്ദുള്‍ റഹ്മാന്‍ പണം നിക്ഷേപിച്ചിരുന്നത്. ‘മഹേഷിന്റെ പ്രതികാരം’ എന്ന സിനിമയില്‍ 60 ശതമാനത്തോളം പണം മുടക്കിയത് അബ്ദുള്‍ റഹ്മാന്‍ ആണെന്നാണ് ഇ ഡിയുടെ കണ്ടെത്തല്‍. കൂടാതെ കോഴിക്കോട് കേന്ദ്രീകരിച്ചുള്ള ഡാലിയ ബില്‍ഡേഴ്സില്‍ ഇയാള്‍ സഹപാര്‍ട്ണറാണെന്നും ഇ ഡിയുടെ അന്വേഷണത്തില്‍ കണ്ടെത്തിയിരുന്നു. പിഎഫ്‌ഐ നേതാക്കളുമായി ബന്ധമുള്ള സ്ഥാപനമാണിത്.
കഴിഞ്ഞദിവസം രാത്രിയാണ് തട്ടിപ്പുകേസില്‍ ഉള്‍പ്പെട്ട അബ്ദുള്‍ റഹ്മാന്‍ കൊച്ചിയിലെ ഹോട്ടലില്‍ എത്തിയത്. തുടര്‍ന്ന് ഇന്നലെ രാവിലെ ഇ ഡി സംഘം ഇയാളെ കസ്റ്റഡിയിലെടുക്കുകയായിരുന്നു. ഇയാളുമായി ബന്ധപ്പെട്ട കോഴിക്കോട്, മലപ്പുറം, കാസര്‍കോട് തുടങ്ങിയ സ്ഥലങ്ങളിലെ ഇരുപത്തഞ്ചോളം കേന്ദ്രങ്ങളിലും ഇ ഡി പരിശോധന നടക്കുന്നു.
പ്രതികരിക്കാൻ ഇവിടെ എഴുതുക: