കോഴിക്കോട് : നവകേരള സദസിനെതിരെ പ്രതിപക്ഷം വലിയ എതിര്പ്പുകള് ഉയര്ത്തവെ കോഴിക്കോട് കുന്ദമംഗലം ബ്ലോക്ക് പഞ്ചായത്തിലെ കോണ്ഗ്രസ്, മുസ്ലീം ലീഗ് നേതാക്കള് നവകേരള സദസ് പ്രഭാത യോഗത്തില് പങ്കെടുത്തു. കുന്ദമംഗലം ബ്ലോക്ക് വികസന സ്റ്റാന്റിംഗ് കമ്മിറ്റി ചെയര്മാന് കോണ്ഗ്രസ് നേതാവ് എന്. അബൂബക്കര്, ലീഗ് പ്രാദേശിക നേതാവ് മൊയ്തു മുട്ടായി, മുസ്ലിം ലീഗ് കൊടുവള്ളി നിയോജക മണ്ഡലം സെക്രട്ടറി യു.കെ ഹുസൈന് എന്നിവരാണ് ഓമശ്ശേരിയില് യോഗത്തിനെത്തിയത്.
കോണ്ഗ്രസ് പെരുവയല് മണ്ഡലം മുന് പ്രസിഡന്റ് കൂടിയാണ് എന്. അബൂബക്കര്. മുസ്ലീം ലീഗ് പ്രദേശിക നേതാവും ചുരം സംരക്ഷണ സമിതി പ്രസിഡണ്ടുമാണ് മൊയ്തു മുട്ടായി.ചുരത്തിലെ പ്രശ്നങ്ങള് മുഖ്യമന്ത്രിയുടെ ശ്രദ്ധയില് പെടുത്താനാണ് യോഗത്തില് പങ്കെടുത്തതെന്ന് മൊയ്തു പ്രതികരിച്ചു.
കൊച്ചി ശാസ്ത്ര സാങ്കേതിക സര്വക ലാശാലയിലെ ദുരന്തത്തിന്റെ പശ്ചാത്തലത്തില്, നവകേരള സദസിന്റെ മൂന്നാം ദിവസമായ ഇന്ന് സാംസ്കാരിക പരിപാടികള് ഒഴിവാക്കിയിട്ടുണ്ട്. രാവിലെ ഒമ്പത് മണിക്കാണ് ഓമശ്ശേരി അമ്പലക്കണ്ടി സ്നേഹതീരം കണ്വെന്ഷന് സെന്ററില് പ്രഭാതയോഗം ചേര്ന്നത്. ഇതിന് ശേഷമുള്ള മുഖ്യമന്ത്രിയുടെ വാര്ത്താ സമ്മേളനവും ഇന്ന് ഒഴിവാക്കി.
വേദിക്ക് മുന്നില് പ്രതിഷേധവുമായി എത്തിയ മൂന്ന് കെ എസ്. യു. പ്രവര്ത്തകരെ പൊലീസ് അറസ്റ്റ് ചെയ്ത് നീക്കി. തിരുവമ്പാടി, ബാലുശ്ശേരി, കൊടുവള്ളി, ബേപ്പൂര്, കുന്ദമംഗലം മണ്ഡലങ്ങളില് നിന്നുള്ള ക്ഷണിതാക്കളാണ് പ്രഭാത യോഗത്തില് പങ്കെടുത്തത്.
