കൊച്ചി : നവകേരളയാത്രയ്ക്കായി സ്കൂള് ബസുകള് വിട്ട് നല്കണമെന്ന പൊതുവിദ്യാഭ്യാസ വകുപ്പ് ഡയറക്ടറുടെ ഉത്തരവിന് സ്റ്റേ. സ്കൂള് ബസ്സുകള് പൊതുയാത്രയ്ക്ക് ഉപയോഗിക്കാന് മോട്ടോര് വാഹന നിയമത്തില് അനുവദിക്കുന്നുണ്ടോ. സര്ക്കാര് ഇക്കാര്യം വ്യക്തമാക്കണം. കോടതിയുടെ അനുമതിയില്ലാതെ സ്കൂള് ബസ്സുകള് നവകേരള യാത്രയ്ക്കായി വിട്ടു നല്കരുതെന്നും ജസ്റ്റിസ് ദേവന് രാമചന്ദ്രന് ഉത്തരവിട്ടു.
നവംബര് 18 മുതല് ഡിസബംര് 23 വരെ നടക്കുന്ന നവകേരള യാത്രയ്ക്കായി സംഘാടകര് ആവശ്യപ്പെട്ടാല് ബസ് വിട്ടു നല്കണമെന്നാണ് പൊതുവിദ്യാഭ്യാസ ഡയറക്ടര് പുറത്തിറക്കിയ സര്ക്കുലറില് പറയുന്നത്. ഇതിനെ ചോദ്യം ചെയ്ത് കാസര്കോട് സ്വദേശിയായ രക്ഷിതാവാണ് കോടതിയെ സമീപിച്ചത്. പ്രവര്ത്തി ദിവസം ബസ് വിട്ടുനല്കാനള്ള നിര്ദ്ദേശം സ്കൂളിന്റെ പ്രവര്ത്തനത്തെ ബാധിക്കും. മോട്ടോര് വാഹന ചട്ടങ്ങള് പ്രകാരം സ്കൂള് ബസുകള് വിദ്യാഭ്യാസ ആവശ്യങ്ങള്ക്ക് മാത്രമേ ഉപയോഗിക്കാവൂ എന്ന് നിഷ്കര്ഷിക്കുന്നുണ്ടെന്നും രക്ഷിതാവ് കോടതിയെ അറിയിച്ചു.
എന്നാല് ആരാണ് ഈ സംഘാടക സമിതി എന്ന് ചോദിച്ച കോടതി അവര് ആവശ്യപ്പെട്ടാല് പൊതു ആവശ്യമാകുമോ എന്നും ചോദിച്ചു. കുട്ടികളുടെ സുരക്ഷയ്ക്കും യാത്രയ്ക്കും വേണ്ടിയുള്ളവയാണ് സ്കൂള് ബസ്സുകള്. അത് മുതിര്ന്ന യാത്രക്കാരെ കൊണ്ടുപോകാനോ, വിദ്യാഭ്യാസേതര ആവശ്യത്തിനും ഉപയോഗിക്കാനും മോട്ടോര് വാഹന വകുപ്പ് നിയമം അനുശാസിക്കുന്നുണ്ടോ ഇക്കാര്യം സര്ക്കാര് വ്യക്തമാക്കണം. ഇക്കാര്യം വിശദീകരിച്ച ശേഷം മാത്രമേ സ്കൂള് ബസ്സുകള് ഇത്തരം ആവശ്യങ്ങള്ക്കായി വിട്ടു നല്കാന് സാധിക്കുമോയെന്ന് തീരുമാനിക്കാനാകൂവെന്നും ഹൈക്കോടതി ആവശ്യപ്പെട്ടു. ഹര്ജി അടുത്ത തിങ്കളാഴ്ച കോടതി വീണ്ടും പരിഗണിക്കും.
