കോഴിക്കോട്: വീട്ടുമുറ്റത്ത് നിര്ത്തിയിട്ടിരുന്ന സ്കൂള് വാന് കത്തിനശിച്ചു. കോഴിക്കോട് കുന്നമംഗലത്താണ് സംഭവം. വിദ്യാര്ഥികളെ സ്കൂളില് വിട്ടതിനുശേഷം മടങ്ങിയെത്തി നിര്ത്തിയിട്ട ഉടനെയാണ് വാഹനത്തില് നിന്ന് തീ ഉയര്ന്നത്. കോണോട്ട് തൂമ്പറ്റച്ചാലില് അബ്ദുറഹിമാന് എന്നയാളുടെ വീടിന് മുമ്പിലാണ് വാഹനം നിര്ത്തിയിരുന്നത്.
പ്രദേശവാസികള് ചേര്ന്ന് തീ അണയ്ക്കാന് ശ്രമം നടത്തിയെങ്കിലും, ഇന്ധന ടാങ്കിലേക്ക് തീ പടര്ന്നതോടെ ആളിപ്പടരുകയായിരുന്നു. ഇത് വാന് നിര്ത്തിയിട്ടിരുന്ന വീടിന്റെ ഒരു ഭാഗത്തേക്കും വ്യാപിച്ചു. തുടര്ന്ന് വെള്ളിമടുകുന്ന് നിന്നും രണ്ട് യൂണിറ്റ് ഫയര്ഫോഴ്സ് സംഘം സ്ഥലത്തെത്തിയാണ് തീ പൂര്ണ്ണമായും അണച്ചത്. പ്രദീഷ് കാട്ടില് എന്നയാളുടെ ഉടമസ്ഥതയിലുള്ള വാന് ആണ് കത്തി നശിച്ചത്.
