ഇരിട്ടി: ബിജെപിക്ക് ഭാരതത്തിലെ ജനമനസ്സില് ഇത്രയേറെ ഇടം നേടാനായത് പ്രത്യയശാസ്ത്രത്തേക്കാള് ഉപരി പ്രവര്ത്തനപന്ഥാവ് കൊണ്ടാണെന്ന് ബിജെപി ദേശീയ ഉപാധ്യക്ഷന് എ.പി. അബ്ദുള്ളക്കുട്ടി പറഞ്ഞു. മോദി സര്ക്കാരിന്റെ ഭരണ നേട്ടങ്ങളും പദ്ധതികളും ജനങ്ങള്ക്ക് മുന്നില് വിശദീകരിക്കുന്നതിനായി എന്ഡിഎ തില്ലങ്കേരി പഞ്ചായത്ത് കമ്മറ്റിയുടെ നേതൃത്വത്തില് തില്ലങ്കേരിയില് നടന്ന ജനപഞ്ചായത്ത് ഉദ്ഘാടനം ചെയ്ത് സംസാരിക്കുകയായിരുന്നു അബ്ദുള്ളക്കുട്ടി.
തെരഞ്ഞെടുപ്പ് നടക്കുന്ന രാജസ്ഥാനിലും മദ്ധ്യപ്രദേശിലും അവിടുത്തെ അടിയൊഴുക്ക് എന്താണെന്ന് മനസ്സിലാക്കിയതോടെ കോണ്ഗ്രസ് നേതാക്കളായ അശോക് ഗെഹ്ലോട്ടും, കമല്നാഥും മറ്റും ബിജെപി കൊണ്ട് നടക്കുന്ന ആശയങ്ങളുടെ പ്രചാരണം ഏറ്റെടുത്തിരിക്കുകയാണെന്നും അദ്ദേഹം പറഞ്ഞു.
ബിജെപി തില്ലങ്കേരി പഞ്ചായത്ത് പ്രസിഡണ്ട് എം.വി. ശ്രീധരന് അധ്യക്ഷനായി. റാഷിദ് സുല്ലമി മുഖ്യപ്രഭാഷണം നടത്തി. ബിഡിജെഎസ് സംസ്ഥാന ഉപാധ്യക്ഷന് പൈലി വാത്യാട്ട്, മഹിളാമോര്ച്ച ജില്ലാ പ്രസിഡണ്ട് റീനമനോഹരന്, ബിജെപി മട്ടന്നൂര് മണ്ഡലം പ്രസിഡണ്ട് ശരത് കൊതേരി, മണ്ഡലം സെക്രട്ടറി പി.എസ്. പ്രകാശന്, വിജയന് വട്ടിപ്രം, സജിത്ത് കൊടോളിപ്രം, എന്. മനോജ്, കെ. ആനന്ദവല്ലി തുടങ്ങിയവര് സംബന്ധിച്ചു.
