കുറച്ച് ദിവസങ്ങള്ക്ക് മുമ്പ് നടി രശ്മിക മന്ദാനയുടെ ഡീപ് ഫേക്ക് വീഡിയോ പുറത്ത് വന്നിരുന്നു. വീഡിയോ പുറത്ത് വന്നതോടെ അമിതാഭ് ബച്ചനടക്കം സിനിമാ മേഖലയില് പ്രവര്ത്തിക്കുന്നവര് കനത്ത പ്രതിഷേധവുമായി രംഗത്തെത്തിയിരുന്നു.
ഇത്തരം സംഭവങ്ങളില് അതൃപ്തി അറിയിച്ച രശ്മിക മന്ദാന സര്ക്കാര് ഇതിനെതിരെ കര്ശന നടപടി സ്വീകരിക്കണമെന്നും ആവശ്യപ്പെട്ടിരുന്നു. ഇപ്പോഴിതാ രശ്മിക മന്ദാനയ്ക്ക് പിന്നാലെ നടി കജോളിന്റെ പേരിലുള്ള വീഡിയോയും പുറത്തുവന്നിരിക്കുകയാണ്.
വസന്തം എന്ന മലയാളം പേജിലാണ് കാജോളിന്റെ വീഡിയോ എത്തിയിരിക്കുന്നത്. ക്യാമറയ്ക്ക് മുന്നില് നിന്ന് വസ്ത്രം മാറുന്നതായാണ് ദൃശ്യങ്ങളില് കാണാനാവുക. കാജോള് വസ്ത്രം മാറുന്ന എന്ന ക്യാപ്ഷനും ഉണ്ട്. ഹോട്ട് കാജോള്, കാജോള് മില്ഫ്, ഹോട്ട് വീല്സ്, ഹോട്ട് ഷോട്ട് എന്നീ ഹാഷ് ടാഗുകളും വീഡിയോയില് ചേര്ത്തിട്ടുണ്ട്.
യാഥാര്ത്ഥത്തില് ഈ വീഡിയോയില് ഉള്ളത് ഇംഗ്ലീഷ് സോഷ്യല് മീഡിയ ഇന്ഫ്ലുവന്സറായ റോസീ ബ്രീന് ആണെന്നാണ് ഇന്ത്യ ടിവി പുറത്തുവിട്ടിരിക്കുന്ന റിപ്പോര്ട്ട്. ‘ഗെറ്റ് റെഡി വിത്ത് മി’ (GRWM) ട്രെന്ഡിന്റെ ഭാഗമായി ജൂണ് അഞ്ചിന് പുറത്തുവിട്ട ടിക് ടോക് വീഡിയോ ആണിത്. ഈ വീഡിയോ മോര്ഫ് ചെയ്ത് കാജോളിന്റെ മുഖം റോസി ബ്രീനിന്റെ ശരീരത്തോട് ചേര്ക്കുകയായിരുന്നു.
ഇന്സ്റ്റാഗ്രാമിലും എക്സ് പ്ലാറ്റ്ഫോമിലും തരംഗമായിരിക്കുകയാണ് ഈ ഡീപ് ഫേക് വീഡിയോ.
അതിനിടെ നടി രശ്മിക മന്ദാനയുടെ ഡീപ് ഫേക്ക് വിഡിയോ പ്രചരിപ്പിച്ചതില് അന്വേഷണം പോലീസ് അന്വേഷണം ഊര്ജ്ജിതമാക്കി. കേസില് ഒരു പത്തൊമ്പതുകാരനെ പൊലീസ് ചോദ്യം ചെയ്തുവരുന്നു. ഇയാള്ക്ക് വീഡിയോ പ്രചരിപ്പിച്ചതില് പങ്കുണ്ടെന്നാണ് പൊലീസ് സംശയിക്കുന്നത്. ഇയാളുടെ സോഷ്യല് മീഡിയ അക്കൗണ്ടില് നിന്നാണ് വീഡിയോ പ്രചരിച്ചതെന്നാണ് പൊലീസ് കരുതുന്നത്. ചോദ്യം ചെയ്യലില് ഒരു ഇന്സ്റ്റാഗ്രാം അക്കൗണ്ടില് നിന്നാണ് ദൃശ്യങ്ങള് കിട്ടിയതെന്നും അത് തന്റെ അക്കൗണ്ടിലേക്ക് അപ് ലോഡ് ചെയ്തെന്നുമാണ് പത്തൊമ്പതുകാരന്റെ മൊഴി. കൂടുതല് ചോദ്യം ചെയ്യല് തുടരുകയാണ്. നടിയുടെ വ്യാജ വീഡിയോ സോഷ്യല് മീഡിയയില് വ്യാപകമായി പ്രചരിച്ചതിനെ തുടര്ന്ന് നവംബര് 10 നാണ്ദില്ലി പൊലീസിന്റെ സ്പെഷ്യല് സെല് കേസെടുത്ത് അന്വേഷണം ആരംഭിച്ചത് .ദില്ലി വനിതാ കമ്മീഷന്റെ നിര്ദ്ദേശപ്രകാരമായിരുന്നു നടപടി.
