കോഴിക്കോട്: സംസ്ഥാനത്ത് വീണ്ടും ലോണ് ആപ്പ് ഭീഷണി. കോഴിക്കോട് കുറ്റിയാടിയില് ലോണ് ആപ്പിന്റെ ഭീഷണിയില് വീട്ടമ്മ ആത്മഹത്യക്ക് ശ്രമിച്ചു. 25-കാരിയാണ് ആത്മഹത്യ ശ്രമം നടത്തിയത്. ഇവരെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
20,000 രൂപയാണ് യുവതി വായ്പ എടുത്തത്. സ്വര്ണം പണയം വച്ചും മറ്റും ഒരു ലക്ഷം രൂപ തിരിച്ചടച്ചിട്ടും ഭീഷണി തുടര്ന്നു. പിന്നാലെ യുവതിയുടെ ചിത്രങ്ങള് മോര്ഫ് ചെയ്ത് ഫോണിലേക്ക് അയച്ചു നല്കുകയായിരുന്നു. ഇവ സമൂഹമാദ്ധ്യമങ്ങളിലൂടെ പ്രചരിപ്പിക്കുമെന്ന് ഭീഷണിപ്പെടുത്തിയതായും വീട്ടമ്മ പറയുന്നു.
പണമില്ലെന്ന് അറിയിച്ചതോടെയാണ് ലോണ് ആപ്പിന്റെ ഭീഷണി സന്ദേശമെത്തിയത്. തുടര്ന്ന് യുവതിയുടെ വാട്സ്ആപ്പിലെ പ്രൊഫൈല് ചിത്രം മോര്ഫ് ചെയ്ത് നഗ്നചിത്രങ്ങളാക്കി ഫോണിലേക്ക് അയച്ചു. രണ്ടു കുട്ടികളുടെ അമ്മയാണ് ആത്മഹത്യക്ക് ശ്രമിച്ച യുവതി.
