മെല്ബണ്: ലോകകപ്പ് ക്രിക്കറ്റിന്െ ലീഗ് ഘട്ടം പൂര്ത്തിയായതിനു പിന്നാലെ ലോകകപ്പ് ഇലവനെ തെരഞ്ഞെടുത്ത് ക്രിക്കറ്റ് ഓസ്ട്രേലിയ. ഈ ഇലവനില് ഭാരത ടീം നായകന് രോഹിത് ശര്മ്മയ്ക്ക് ഇടമില്ല. പകരം ഈ ലോകകപ്പിലെ ടോപ് സ്കോററായ വിരാട് കോഹ്ലിയാണ് നായകന്. ഒന്പത് കളികളില് നിന്ന് രണ്ട് സെഞ്ചുറിയും അഞ്ച് അര്ധസെഞ്ചുറിയുമടക്കം 594 റണ്സാണ് കോഹ്ലിയുടെ സമ്പാദ്യം. കോഹ്ലിക്ക് പുറമെ രവീന്ദ്ര ജഡേജ, മുഹമ്മദ് ഷമി, ജസ്പ്രീത് ബുംറ എന്നിവരും ടീമിലുണ്ട്.
ലോകകപ്പില് 500 ലേറെ റണ്സും തുടര്ച്ചയായി ഒമ്പത് വിജയങ്ങളും നേടിയ രോഹിത്തിനെ എന്തുകൊണ്ട് ക്യാപ്റ്റനാക്കിയില്ല എന്ന ചോദ്യവുമായി ആരാധകരും രംഗത്തെത്തിയിട്ടുണ്ട്.
ദക്ഷിണാഫ്രിക്കയുടെ ക്വിന്റണ് ഡി കോക്ക് ആണ് ക്രിക്കറ്റ് ഓസ്ട്രേലിയ തെരഞ്ഞെടുത്ത ലോകകപ്പ് ടീമിലെ ഓപ്പണര്മാരിലൊരാള്. ഒമ്പത് കളികളില് നാലു സെഞ്ചുറി അടക്കം 591 റണ്സാണ് ഡി കോക്ക് ഈ ലോകകപ്പില് അടിച്ചെടുത്തത്. ഡി കോക്കിനൊപ്പം ഓപ്പണറായി ഇറങ്ങുന്നത് ഓസ്ട്രേലിയന് താരം ഡേവിഡ് വാര്ണറാണ് എന്നതാണ് ശ്രദ്ധേയം. ഒമ്പത് കളികളില് നിന്ന് രണ്ട് സെഞ്ചുറികളോടെ 49 9റണ്സാണ് വാര്ണറുടെ സമ്പാദ്യം.
മൂന്നാം നമ്പറില് ന്യൂസിലന്ഡിന്റെ യുവതാരം രചിന് രവീന്ദ്രയാണ് ഇറങ്ങുന്നത്. ഒമ്പത് കളികളില് മൂന്ന് സെഞ്ചുറിയോടെ 565 റണ്സാണ് രചിന് നേടിയത്.
ദക്ഷിണാഫ്രിക്കയുടെ ഏയ്ഡന് മാര്ക്രമാണ് അഞ്ചാമത്. ഒമ്പത് കളികളില് 396 റണ്സാണ് മാര്ക്രം നേടിയത്. ഓസ്ട്രേലിയയുടെ ഗ്ലെന് മാക്സ്വെല്ലാണ് ആറാം നമ്പറില്. ഏഴ് കളികളില് ഒരു ഡബിള് സെഞ്ചുറി ഉള്പ്പെടെ 397 റണ്സാണ് മാക്സ്വെല് അടിച്ചെടുത്തത്.
ദക്ഷിണാഫ്രിക്കയുടെ മാര്ക്കോ ജാന്സനാണ് പേസ് ഓള് റൗണ്ടറായി ടീമിലുള്ളത്. മുഹമ്മദ് ഷമിയാണ് ക്രിക്കറ്റ് ഓസ്ട്രേലിയ തെരഞ്ഞെടുത്ത ലോകകപ്പ് ടീമിലെ മൂന്നാമത്തെ ഭാരതീയ താരം. അഞ്ച് മത്സരങ്ങളില് 16 വിക്കറ്റാണ് ഷമി എറിഞ്ഞിട്ടത്. രണ്ട് അഞ്ച് വിക്കറ്റ് നേട്ടവും ഇതിലുണ്ട്. ജഡേജക്ക് പുറമെ ആദം സാംപയാണ് ടീമിലെ രണ്ടാം സ്പിന്നര്. ഒമ്പത് കളികളില് 17 വിക്കറ്റാണ് സാംപ നേടിയത്. ടീമിലെ മൂന്നാം പേസറായി ഇടം നേടിയത് ഭാരതത്തിന്റെ ജസ്പ്രീത് ബുമ്രയാണ്. ഒമ്പത് കളികളില് 17 വിക്കറ്റാണ് ബുമ്ര നേടിയത്.
ടീം: ക്വിന്റണ് ഡി കോക്ക്, ഡേവിഡ് വാര്ണര്, രചിന് രവീന്ദ്ര, വിരാട് കോഹ്ലി (ക്യാപ്്റ്റന്), എയ്ഡന് മാര്ക്രം, ഗ്ലെന് മാക്സ്വെല്, മാര്കോ ജാന്സന്, രവീന്ദ്ര ജഡേജ, മുഹമ്മദ് ഷമി, ആദം സാംപ, ജസ്പ്രീത് ബുംറ, ദില്ഷന് മധുഷന്ക (12-ാമന്).
