തൃപ്പൂണിത്തുറ: വ്യാസദര്ശനങ്ങളില് വെള്ളം ചേര്ക്കുന്ന വ്യാഖ്യാനങ്ങളെ ശക്തമായി എതിര്ത്ത സര്ഗതപസാണ് പ്രൊഫ. തുറവൂര് വിശ്വംഭരന് നിര്വഹിച്ചതെന്ന് ജസ്റ്റിസ് എന്. നഗരേഷ്. തപസ്യ കലാ സാഹിത്യ വേദി തൃപ്പൂണിത്തുറ ലായം കൂത്തമ്പലത്തില് സംഘടിപ്പിച്ച സ്മൃതിസദസില് തുറവൂര് വിശ്വംഭരന് സ്മാരക പുരസ്കാരം പ്രൊഫ.നടുവട്ടം ഗോപാലകൃഷ്ണന് സമ്മാനിച്ച് സംസാരിക്കുകയായിരുന്നു അദ്ദേഹം.
വിശ്വംഭരന് മാഷിനെ അടുത്ത് പരിചയമുണ്ടായിരുന്നെങ്കിലും സാഹിത്യത്തെ കൂറിച്ച് അദ്ദേഹത്തോട് സംവദിക്കാന് ഭയമായിരുന്നുവെന്ന് നഗരേഷ് പറഞ്ഞു. അപാരമായ പാണ്ഡിത്യം കൊണ്ട് അദ്ദേഹം എല്ലാവരെയും അതിശയിപ്പിച്ചു. ദാര്ശനികന്, സാഹിത്യകാരന്, സാമൂഹിക പ്രവര്ത്തകന് തുടങ്ങി എല്ലാ മേഖലകളിലും അദ്ദേഹം തന്റേതായ മുദ്ര സ്ഥാപിച്ചു, നഗേരഷ് പറഞ്ഞു.
മഹാഭാരതത്തിന്റെ നിലവിലുള്ള ദൂര്ബലമായ വ്യാഖ്യാനങ്ങളെ വിമര്ശിക്കുന്ന ഗ്രന്ഥമാണ് വിശ്വംഭരന് മാഷിന്റെ മഹാഭാരത പര്യടനമെന്ന് മഹാഭാരതത്തിന്റെ വിശ്വദര്ശനം എന്ന വിഷയം അവതരിപ്പിച്ച് സംസാരിച്ച എഴുത്തുകാരി ഡോ.ആര്. അശ്വതി പറഞ്ഞു. മിത്തുകളുടെ രാഷ്ട്രീയത്തെയും യുദ്ധങ്ങളുടെ രാഷ്ട്രീയത്തെയും പ്രവചനസദൃശമായ രീതിയില് അദ്ദേഹം എഴുതിവച്ചു. ചോദ്യങ്ങളേറെ ഉയര്ത്തുന്ന പുരാവൃത്തങ്ങളെ വ്യാസന്റെ കാഴ്ചപ്പാടിലൂടെ യുക്തിഭദ്രമായി അദ്ദേഹം അവതരിപ്പിച്ചുവെന്ന് ഡോ. അശ്വതി പറഞ്ഞു.
തപസ്യ സംസ്ഥാന അധ്യക്ഷന് പ്രൊഫ. പി.ജി. ഹരിദാസ് അധ്യക്ഷനായി. ചടങ്ങില് പാര്ലമെന്റില് ലാല് ബഹദൂര് ശാസ്ത്രിയെക്കുറിച്ച് സംസാരിച്ച പി.അനഘയെയും കേരള സര്ക്കാരിന്റെ ചെമ്പൈ സ്മാരക ട്രസ്റ്റിന്റെ പേരിലുളള 2023 ലെ ചെമ്പൈ പുരസ്കാരം നേടിയ ആര്യദത്തയെയും ജസ്റ്റിസ് എന്. നഗരേഷ് ആദരിച്ചു.
തപസ്യ സംസ്ഥാന പൊതുകാര്യദര്ശി കെ.ടി. രാമചന്ദ്രന്, വര്ക്കിങ് പ്രസിഡന്റ് കല്ലറ അജയന്, സാഹിത്യ പരിഷത്ത് മുന് കാര്യദര്ശി എം.വി. ബെന്നി, തപസ്യ ജില്ലാ അധ്യക്ഷന് വെണ്ണല മോഹന്, സെക്രട്ടറി കെ. സതീഷ് ബാബു, സംസ്കാര് ഭാരതി ദേശീയ സമിതി അംഗം കെ. ലക്ഷ്മി നാരായണന് എന്നിവര് ചടങ്ങില് പങ്കെടുത്തു.
