കൊച്ചി: ജനതാദള് (എസ്)ലെ ദേവഗൗഡ വിരുദ്ധരുടെ യോഗം 15ന് തിരുവനന്തപുരം വെള്ളോര് ടൂറിസ്റ്റ് വില്ലേജില് വിളിച്ച് ദേശീയ വൈസ് പ്രസിഡന്റും മുന് മന്ത്രിയുമായ സി.കെ.നാണു വിളിച്ചു. മുന്കേന്ദ്രമന്ത്രി സി.എം. ഇബ്രാഹിം ഉള്പ്പെടെയുള്ള ദേശീയ നിര്വാഹക സമിതി അംഗങ്ങള് പങ്കെടുക്കുന്ന യോഗം ദേശീയ പ്ലീനറി സമ്മേളനം വിളിക്കുന്നതിന് അനുവാദം നല്കുമെന്നാണ് സംഘാടകരുടെ അവകാശ വാദം.
എന്നാല്, സി.കെ. നാണുവിന്റെ യോഗം തങ്ങള് അറിഞ്ഞിട്ടില്ല എന്നാണ് സംസ്ഥാന പ്രസിഡന്റ് മാത്യു ടി. തോമസും മന്ത്രി കെ. കൃഷ്ണന് കുട്ടിയും പറയുന്നത്. ഒക്ടോബര് 7 ന് കൊച്ചിയില് ചേര്ന്ന സംസ്ഥാന എക്സിക്യൂട്ടീവ് യോഗത്തില് ദേവഗൗഡയ്ക്കെതിരെ സമാന ചിന്താഗതിക്കാരുടെ യോഗം വിളിച്ചുകൂട്ടാന് സി.കെ നാണുവിനെ ചുമതലപ്പെടുത്തിയിരുന്നു. ബിജെപിയുമായി സഖ്യത്തിലാകാനുള്ള തീരുമാനത്തെ എതിര്ക്കുന്ന കേരള നേതാക്കള് ഇതോടെ വെട്ടിലായിരിക്കുകയാണ്. സി.കെ.നാണു വിളിക്കുന്ന വിമത യോഗത്തില് എംഎല്എമാരായ മാത്യു ടി. തോമസും കെ.കൃഷ്ണന് കുട്ടിയും പങ്കെടുത്താല് അവര്ക്ക് കൂറുമാറ്റ നിരോധന നിയമ പ്രകാരം നിയമസഭാംഗത്വത്തിന് അയോഗ്യത കല്പ്പിക്കപ്പെടും.
ഇടതു മുന്നണിയും സമ്മര്ദത്തിലാണ്. ദേവഗൗഡയെ ദേശീയ അധ്യക്ഷനായി അംഗീകരിക്കുന്ന മാത്യു ടി. തോമസ് വിഭാഗത്തെ കൂടെ നിര്ത്താന് എല്ഡിഎഫിന് കഴിയാതെ വരും. മന്ത്രി കൃഷ്ണന് കുട്ടിയോടും മാത്യു ടി. തോമസിനോടും നിയമസഭാംഗത്വം രാജിവച്ച് ഉപതെരഞ്ഞെടുപ്പിനെ നേരിടാന് നിര്ദേശിക്കുകയാണ് സിപിഎമ്മിനുള്ള ഏക പോംവഴി. ഇത്തരമൊരു നിര്ദേശം സിപിഎം സംസ്ഥാന കമ്മിറ്റി യോഗത്തിലും ഉയര്ന്നതായി അറിയുന്നു.
ജന്മഭൂമി ഓണ്ലൈന്