കോഴിക്കോട്: ഐ ലീഗില്‍ സ്വന്തം തട്ടകത്തില്‍ നടന്ന പോരാട്ടത്തില്‍ തകര്‍പ്പന്‍ ജയം നേടി ഗോകുലം കേരള എഫ്‌സി. നെരോക്ക എഫ്‌സിയെ ഒന്നിനെതിരെ നാല് ഗോളുകള്‍ക്കാണ് ഗോകുലം ഇന്നലെ തോല്‍പ്പിച്ചത്. മുന്‍പ് രണ്ട് തവണ ജേതാക്കളായ ടീം സീസണില്‍ നേടുന്ന ആദ്യ ജയമാണിത്.
കഴിഞ്ഞയാഴ്ച നടന്ന ആദ്യ മത്സരത്തില്‍ പുതുമുഖ ടീം ഇന്റര്‍കാശിയോട് ഞെട്ടിക്കുന്ന സമനില വഴങ്ങേണ്ടിവന്നിരുന്നു. നായകന്‍ അലെക്‌സ് സാഞ്ചസിന്റെ ഇരട്ടഗോളിന്റെയും നിലി, ഇമ്മാനുവേല്‍ എന്നിവരുടെ ഓരോ ഗോളിന്റെയും ബലത്തിലാണ് ഗോകുലം ഇന്നലെ വിജയം പിടിച്ചെടുത്തത്.
കളിയുടെ 28-ാം മിനിറ്റില്‍ മദ്ധ്യനിരതാരം നിലി ആണ് ഗോകുലത്തിനായി ആദ്യം വലകുലുക്കിയത്. ഈ ഒരു ഗോളിന്റെ ലീഡില്‍ ഒന്നാം പകുതിക്ക് പിരിഞ്ഞു. നായകന്‍ അലക്‌സ് സാഞ്ചസിന്റെ ഗോളോടെയാണ് രണ്ടാം പകുതി തുടങ്ങിയത്. 48-ാം മിനിറ്റില്‍ ഗോകുലം ഗോള്‍ ഇരട്ടിപ്പിച്ചു. കളി പുരോഗമിക്കവെ 83-ാം മിനിറ്റില്‍ ഒരോ ഗോളടിച്ച് നെരോക്ക വെല്ലുവിളിയുയര്‍ത്തി. ഡേവിഡ് സിംബോ ആണ് ഗോളടിച്ചത്. രണ്ട് മിനിറ്റിനകം ഇമ്മാനുവലിലൂടെ ഗോകുലം ലീഡ് വര്‍ദ്ധിപ്പിച്ചു. 88-ാം മിനിറ്റില്‍ ലഭിച്ച പെനല്‍റ്റി വലയിലെത്തിച്ച് സാഞ്ചെസ് ഇരട്ടഗോള്‍ തികച്ചു. ജയത്തോടെ ഗോകുലം മൂന്നാം സ്ഥാനത്തെത്തി.
പ്രതികരിക്കാൻ ഇവിടെ എഴുതുക: