കോഴിക്കോട്: വിവാദ പരാമര്‍ശങ്ങളെ തുടര്‍ന്ന് ഐഎസ്ആര്‍ഒ ചെയര്‍മാന്‍ എസ് സോമനാഥിന്റെ ആത്മകഥ, നിലാവ് കുടിച്ച സിംഹങ്ങള്‍ പിന്‍വലിച്ചു. താന്‍ ഐ എസ് ആര്‍ ഒ ചെയര്‍മാനാകുന്നത് കെ ശിവന്‍ തടയാന്‍ ശ്രമിച്ചുവെന്ന് സോമനാഥ് പുസ്തകത്തില്‍ വെളിപ്പെടുത്തിയിരുന്നു.
കോഴിക്കോട് ലിപി പബ്ലിക്കേഷന്‍സ് ആയിരുന്നു ആത്മകഥയുടെ പ്രസാധകര്‍. മൂന്ന് വര്‍ഷം ചെയര്‍മാനായിരുന്ന ശേഷം വിരമിക്കുന്നതിനു പകരം കാലാവധി നീട്ടിയെടുക്കാന്‍ ശിവന്‍ ശ്രമിച്ചുവെന്നും ആത്മകഥയില്‍ പറയുന്നുണ്ട്..
2018-ല്‍ എ എസ് കിരണ്‍ കുമാര്‍ ചെയര്‍മാന്‍ സ്ഥാനം ഒഴിഞ്ഞപ്പോള്‍, 60 വയസു കഴിഞ്ഞ് എക്സ്റ്റന്‍ഷനില്‍ തുടരുകയായിരുന്ന ശിവന്റെ പേരിനൊപ്പം തന്റെ പേരും പട്ടികയില്‍ വന്നു. ചെയര്‍മാന്‍ ആകുമെന്ന് അന്നു പ്രതീക്ഷിച്ചെങ്കിലും ശിവനാണ് നറുക്കു വീണത്. ചെയര്‍മാനായ ശേഷവും ശിവന്‍ വിഎസ്എസ്സി ഡയറക്ടര്‍ സ്ഥാനത്ത് തുടര്‍ന്നു. ന്യായമായി കിട്ടേണ്ട ആ തസ്തികയ്‌ക്കായി നേരിട്ടു ചോദിച്ചപ്പോള്‍ ശിവന്‍ ഉത്തരം നല്‍കാതെ ഒഴിഞ്ഞു മാറി. പിന്നീട് വിഎസ്എസ്സി മുന്‍ ഡയറക്ടര്‍ ഡോ. ബി എന്‍ സുരേഷ് ഇടപെട്ടതോടെയാണ് ആറ് മാസത്തിനു ശേഷം തനിക്ക് വിഎസ്എസ്സി ഡയറക്ടറായി നിയമനം കിട്ടിയതെന്നും സോമനാഥ് ആത്മകഥയില്‍ പറഞ്ഞിരുന്നു.
ചന്ദ്രയാന്‍ 2 ദൗത്യം ചന്ദ്രനില്‍ ഇറങ്ങുന്ന ദിവസം പ്രധാനമന്ത്രി നരേന്ദ്ര മോദി എത്തിയപ്പോള്‍ സ്വീകരിക്കുന്നവരുടെ കൂട്ടത്തില്‍ തന്നെ ഉള്‍പ്പെടുത്തിയില്ല.ലാന്‍ഡിംഗ് പരാജയപ്പെടാന്‍ കാരണം സോഫ്റ്റ്വെയറിലെ തകരാറാണെന്ന് തുറന്നു പറയുന്നതിനു പകരം ലാന്‍ഡറുമായുള്ള ബന്ധം സ്ഥാപിക്കാനാകുന്നില്ല എന്നാണ് ചെയര്‍മാന്‍ പ്രഖ്യാപിച്ചത്.
കിരണ്‍ കുമാര്‍ ചെയര്‍മാന്‍ പദവി വഹിക്കുമ്പോള്‍ തുടങ്ങിയ ചന്ദ്രയാന്‍ 2 പദ്ധതിയില്‍ ശിവന്‍ പല മാറ്റങ്ങളും വരുത്തി.ചന്ദ്രയാന്‍ 3 വിജയിച്ചപ്പോള്‍ പ്രധാനമന്ത്രി നേരിട്ടെത്തി അഭിനന്ദിച്ചതാണ് ഏറ്റവും വലിയ സംതൃപ്തി നല്‍കിയതെന്നും സോമനാഥ് പുസ്തകത്തില്‍ പറഞ്ഞിരുന്നു.
പ്രതികരിക്കാൻ ഇവിടെ എഴുതുക: