ന്യൂദല്ഹി: രാജസ്ഥാനില് 58 പേരടങ്ങുന്ന മൂന്നാംഘട്ട സ്ഥാനാര്ത്ഥി പട്ടിക ബിജെപി പുറത്തിറക്കി. സര്ദാര്പുരയില് മുഖ്യമന്ത്രിയുടെ കോണ്ഗ്രസ് നേതാവുമായ അശോക് ഗെഹ്ലോട്ടിനെതിരെ വിഖ്യാത ഭജന് ഗായകന് മഹേന്ദ്ര സിങ് റാത്തോഡിനെയാണ് ബിജെപി രംഗത്തിറക്കിയത്. ഹിന്ദി മേഖലയില് ലക്ഷക്കണക്കിന് ആരാധകരുള്ള ഗായകനാണ് റാത്തോഡ്.
കോണ്ഗ്രസ് നേതാവും പാര്ട്ടിക്കുള്ളില് ഗെഹ്ലോട്ടിന്റെ എതിരാളിയുമായ സച്ചിന് പൈലറ്റിനെതിരെ ടോങ്ക് മണ്ഡലത്തില് മുന് എംഎല്എ അജിത് സിങ് മേത്തയാണ് മത്സരിക്കുന്നത്.
ടോങ്കിലെതന്നെ എംഎല്എ ആയിരുന്ന അജിത് സിങ്ങിന്റെ ജനപിന്തുണ സച്ചിന് വെല്ലുവിളിയാകും. അടുത്തിടെ കോണ്ഗ്രസ് വിട്ട് ബിജെപിയില് ചേര്ന്ന ഉദയ് ലാല് ഡംഗി, സുഭാഷ് മീല്, ദര്ശന് സിങ് എന്നിവരും പട്ടികയിലുണ്ട്.
ഏഴ് വനിതകളും മൂന്നാംഘട്ട സ്ഥാനാര്ത്ഥി പട്ടികയില് ഉള്പ്പെട്ടു. ആള്വാറിലെ ബഹ്റോര് മണ്ഡലത്തില്നിന്ന് മുന് മന്ത്രി ജസ്വന്ത് സിങ് യാദവ് മത്സരിക്കും. മുന് കോണ്ഗ്രസ് നേതാവും മുന് കേന്ദ്രമന്ത്രിയുമായ നട്വര് സിങ്ങിന്റെ മകന് ജഗത് സിങ് ഭരത് പൂരിലെ നദ്ബായി മണ്ഡലത്തില് നിന്ന് ജനവിധി തേടും.
