തിരുവനന്തപുരം: സെക്രട്ടേറിയറ്റില്‍ ഭരണാനുകൂല സംഘടനയിലെ ജീവനക്കാര്‍ തമ്മില്‍ കയ്യാങ്കളി. ധനകാര്യ വകുപ്പിലെ ഓഫീസ് അസിസ്റ്റന്റും പൊതുഭരണ വകുപ്പില്‍ ആഭ്യന്തരവിഭാഗത്തിലെ രഹസ്യസ്വഭാവമുള്ള വിഭാഗത്തിലെ ജീവനക്കാരനും തമ്മിലായിരുന്നു സംഘര്‍ഷം.
ഇന്നലെ രാവിലെ ധനകാര്യ വിഭാഗത്തിലെ ജീവനക്കാരനും പൊതുഭരണ വകുപ്പിലെ ജീവനക്കാരനും തമ്മില്‍ ട്രെയിനില്‍ വച്ച് വാക്കുതര്‍ക്കം ഉണ്ടാവുകയും തുടര്‍ന്ന് ആഭ്യന്തര വകുപ്പിലെ ജീവനക്കാരന്‍ ധനകാര്യവകുപ്പിലെ ജീവനക്കാരനെ മര്‍ദിക്കുകയും ചെയ്തു. ഉച്ചയോടെ പ്രതികാരം വീട്ടാന്‍ ധനകാര്യവകുപ്പിലെ ജീവനക്കാര്‍ സംഘടിച്ച് ആഭ്യന്തര വിഭാഗത്തിലെ അതീവ രഹസ്യ സ്വഭാവമുള്ള വിഭാഗത്തില്‍ എത്തി കയ്യാങ്കളി തുടങ്ങി.
അനുവാദമില്ലാതെ അകത്തുകടക്കാന്‍ പാടില്ലാത്ത അതീവ രഹസ്യ സ്വഭാവ വിഭാഗത്തിലായിരുന്നു ഇരുകൂട്ടരുടെയും സംഘടിതമായുള്ള കയ്യാങ്കളി. തുടര്‍ന്ന് മുതിര്‍ന്ന ഉദ്യോഗസ്ഥരെത്തി ഇരുകൂട്ടരെയും പിന്‍തിരിപ്പിച്ചു. എന്നാല്‍ അതീവ രഹസ്യ സ്വഭാവമുള്ള പൊതു ഭരണ വകുപ്പിലെ ആഭ്യന്തര വിഭാഗത്തില്‍ നടന്ന കയ്യാങ്കളി സംബന്ധിച്ച് വകുപ്പ് മേധാവി വിശദീകരണം ആവശ്യപ്പെട്ടിട്ടുണ്ട്. ഇതോടെ തന്നെ മര്‍ദിച്ചെന്ന് കാട്ടി ധനകാര്യ വകുപ്പിലെ ജീവനക്കാരന്‍ റെയില്‍വെ പോലീസിന് പരാതി നല്‍കാനുള്ള നീക്കത്തിലാണ്.
പ്രതികരിക്കാൻ ഇവിടെ എഴുതുക: