ദര്‍ശന്‍ ഹീരാനന്ദാനി തന്നെ കുറ്റപ്പെടുത്തി പാര്‍ലമെന്‍റ് സദാചാരകമ്മിറ്റിയ്‌ക്ക് റിപ്പോര്‍ട്ട് നല്‍കിയെന്ന വാര്‍ത്ത ശരിയാണോ എന്ന് സംശയമുണ്ടെന്ന് മഹുവ മൊയ്ത്ര. അദാനിയെ മുറിവേല്‍പിക്കുന്ന ചോദ്യങ്ങള്‍ ലോക് സഭയില്‍ ഉയര്‍ത്താന്‍ തൃണമൂല്‍ എംപിയ്‌ക്ക് താന്‍ പണവും വിലപിടിപ്പുള്ള സമ്മാനങ്ങളും നല്‍കിയെന്നും ലോക് സഭാ വെബ്സൈറ്റില്‍ മഹുവ മൊയ്ത്രയ്‌ക്കുള്ള പേജിലേക്ക് പോകാനുള്ള പാസ് വേഡ് അടക്കം തനിക്ക് അവര്‍ നല്‍കിയെന്നും ദര്‍ശന്‍ ഹീരാനന്ദാനി എന്ന വ്യവസായി സമ്മതിച്ചു എന്ന രീതിയിലാണ് കത്ത് പരക്കുന്നത്. അദാനിയെ ലോക് സഭയില്‍ വേട്ടയാടുന്നതിന് പ്രത്യുപകാരമായി മഹുവ മൊയ്ത്രയുടെ വീട് പുതുക്കിപ്പണിതു നല്‍കി എന്നും ദര്‍ശന്‍ ഹീരാനന്ദാനി ഈ കത്തില്‍ സമ്മതിക്കുന്നതായി പറയുന്നു.
എന്നാല്‍ ഇങ്ങിനെ ഒരു കത്ത് ഇറങ്ങിയിട്ടില്ലെന്നാണ് മഹുവ മൊയ്ത്ര പ്രസ്താവനയില്‍ ഇപ്പോള്‍ പറയുന്നത്. തന്റെ സല്‍പ്പേര് കളയാന്‍ വേണ്ടിയാണ് ഈ വാര്‍ത്ത സൃഷ്ടിച്ചിരിക്കുന്നതെന്നും മഹുവ മൊയ്ത്ര പറയുന്നു.
ദര്‍ശന്‍ ഹീരാനന്ദാനിയുടെ ലെറ്റര്‍ പാഡിലല്ല, പകരം വെറും വെള്ളക്കടലാസില്‍ ഇത്തരമൊരു സത്യവാങ്മൂലം ഒപ്പിട്ടുനല്‍കിയെന്നാണ് പറയുന്നത്. അങ്ങിനെ ദര്‍ശന്‍ ഹീരാനന്ദാിനെപ്പോലെ ഒരു ബിസിനസ്സുകാരന്‍ ചെയ്യില്ലെന്നും മഹുവ മൊയ്ത്ര പറയുന്നു. അതേ സമയം ദര്‍ശന്‍ ഹീരാനന്ദാനിയുമായി തനിക്ക് ബന്ധമുണ്ടെന്ന കാര്യത്തെക്കുറിച്ച് മഹുവ മൊയ്ത്ര ഇപ്പോഴും മൗനം പാലിക്കുകയാണ്.
പ്രതികരിക്കാൻ ഇവിടെ എഴുതുക: