ന്യൂദല്‍ഹി: അദാനിയെ കളങ്കപ്പെടുത്താനുള്ള ചോദ്യങ്ങള്‍ പാര്‍ലമെന്‍റില്‍ ചോദിക്കാന് തൃണമൂല്‍ എംപി മഹുവ മൊയ്ത്ര കൈക്കൂലി വാങ്ങിയെന്ന ആരോപണം സിബിഐ അന്വേഷിക്കണമെന്ന് ആവശ്യപ്പെട്ട് പരാതി നല്‍കി സുപ്രീംകോടതി അഭിഭാഷകന്‍.
സുപ്രീംകോടതി അഭിഭാഷകനായ ജെയ് ആനന്ദ് ദേഹദ്രായ് ആണ് സിബിഐയ്‌ക്ക് പരാതി നല്‍കിയിരിക്കുന്നത്. ഒരു വലിയ ക്രിമിനല്‍ ഗൂഢാലോചനയുടെ ഭാഗമായാണ് മഹുവ മൊയ്ത്ര കൈക്കൂലി വാങ്ങിയതെന്ന് പരാതിയില്‍ പറയുന്നു. മഹുവ മൊയ്ത്ര ദര്‍ശന്‍ ഹീരാനന്ദാനിയില്‍ നിന്നും കൈക്കൂലി വാങ്ങിയതിന്റെ ചോദ്യം ചെയ്യാനാവാത്ത തെളിവുകള്‍ ലഭിച്ചിട്ടുണ്ടെന്ന് ജെയ് ആനന്ദ് ദേഹദ്രായ് അവകാശപ്പെടുന്നു.
അദാനിയ്‌ക്കെതിരായ ചോദ്യങ്ങള്‍ പാര്‍ലമെന്‍റില്‍ ചോദിക്കാന് മഹുവ മൊയ്ത്ര കൈക്കൂലിയായി ഏകദേശം രണ്ട് കോടി രൂപയും പുതിയ ആപ്പിള്‍ ഐഫോണും ഹീരാനന്ദാനി ഗ്രൂപ്പ് സിഇഒ ദര്‍ശന്‍ ഹീരാനന്ദാനിയില്‍ നിന്നും കൈക്കൂലി വാങ്ങിയെന്നതാണ് പരാതി. പാര്‍ലമെന്‍റിലെ ചോദ്യങ്ങളിലൂടെ അദാനിയെയും അദാനി ഗ്രൂപ്പിനെയും കളങ്കപ്പെടുത്തുക എന്നതായിരുന്നു മഹുവ മൊയ്ത്രയുടെ ലക്ഷ്യമെന്ന് പറയുന്നു. അദാനി ഗ്രൂപ്പിന്റെ കീര്‍ത്തിയും വിപണിയിലെ സ്ഥാനവും ഗുഡ് വില്ലും തകര്‍ക്കാനുള്ള ഗൂഢാലോചന 2018 മുതല്‍ ആരംഭിച്ചതായി അഭിഭാഷകന്‍ പരാതിയില്‍ പറയുന്നു.
ഹീരാനന്ദാനി ഗ്രൂപ്പിന്റെ ചില ബിസിനസുകള്‍ അദാനി ഗ്രൂപ്പിന് ലഭിച്ചതിലുള്ള പകയാണ് മഹുവ മൊയ്ത്രയെ കൂട്ടുപിടിച്ച് അദാനിയ്‌ക്കെതിരെ പാര്‍ലമെന്‍റില്‍ ചോദ്യങ്ങള്‍ ഉയര്‍ത്തിയതിന് കാരണമായി ചൂണ്ടിക്കാണിക്കപ്പെടുന്നത്.
പ്രതികരിക്കാൻ ഇവിടെ എഴുതുക: