തിരുവനന്തപുരം: ആറും എട്ടും വയസ്സുള്ള പിഞ്ചു കുഞ്ഞുങ്ങളുടെ മുന്നിലിട്ട് യുവതിയെ തലയിലും കഴുത്തിലും വെട്ടികൊലപ്പെടുത്തിയ വര്ക്കല അയിരൂര് ഷാലു കൊലക്കേസില് പ്രതി മാതൃസഹോദരന് ചെമ്മരുതി സ്വദേശി ഇങ്കി അനില് എന്ന അനിലിന് ജീവപര്യന്തം കഠിന തടവും 17.21 ലക്ഷം രൂപ പിഴയും ശിക്ഷ വിധിച്ചു. തിരുവനന്തപുരം ഏഴാം അഡീഷണല് ജില്ലാ സെഷന്സ് കോടതിയാണ് മരണം വരെയുള്ള കഠിനതടവെന്ന് വിധിന്യായത്തില് വ്യക്തമാക്കി വിധി പ്രസ്താവിച്ചത്. കരുതിക്കൂട്ടിയുള്ള നിഷ്ഠൂരകൃത്യം ചെയ്ത പ്രതി യാതൊരു ദയയ്ക്കും അര്ഹനല്ലെന്ന് വിധിന്യായത്തില് ജഡ്ജി പ്രസുന് മോഹന് വ്യക്തമാക്കി.
പിഴത്തുകയില് 7.5 ലക്ഷം വീതം ഷാലുവിന്റെ മൈനറായ രണ്ടു മക്കള്ക്ക് നല്കണം. രണ്ടു ലക്ഷം രൂപ ഷാലുവിന്റെ ഭര്ത്താവ് സജീവിനും നല്കണം. കൂടാതെ ഇരകള്ക്കുള്ള നഷ്ടപരിഹാര ഫണ്ടില് നിന്നും കുട്ടികളുടെ ഭാവി നന്മയ്ക്കായി മതിയായ തുക സര്ക്കാര് നഷ്ടപരിഹാരം നല്കാനും കോടതി ഉത്തരവിട്ടു. പ്രസ് ജീവനക്കാരിയായ ഷാലുവിനെ വീട്ടില് നിന്ന് ഉച്ചഭക്ഷണം കഴിഞ്ഞ് വരുന്ന വഴിയില് കാത്തുനിന്ന് കൊലപ്പെടുത്തിയ സംഭവം സമൂഹ മനഃസാക്ഷിയെ ഞെട്ടിച്ചതാണെന്നും അതിനാല് പ്രതിക്ക് പരമാവധി ശിക്ഷ നല്കണമെന്നുമുള്ള പ്രോസിക്യൂട്ടര് കെ.എല്. ഹരീഷ്കുമാറിന്റെ വാദം അംഗീകരിച്ചാണ് കോടതി ഉയര്ന്ന ശിക്ഷ വിധിച്ചത്.
പ്രോസിക്യൂഷന് ഹാജരാക്കിയ രേഖകള് പ്രതിയുടെ ക്രിമിനല് പശ്ചാത്തലം വ്യക്തമാക്കുന്നതായും കോടതി വിധിന്യായത്തില് പറയുന്നു. സാക്ഷി പറഞ്ഞാല് കൊല്ലുമെന്ന് ഭീഷണിപ്പെടുത്തിയെന്നും പ്രതിക്കെതിരെ കേസുണ്ട്. ശിക്ഷ നടപ്പിലാക്കാന് പ്രതിയെ പൂജപ്പുര സെന്ട്രല് ജയിലിലേക്കയച്ചു.
2022 ഏപ്രില് 28ന് ഉച്ചയ്ക്കാണ് വര്ക്കല ചാവടിമുക്ക് തൈപ്പൂയം വീട്ടില് ഷാലുവിന് (36) വെട്ടേറ്റത്. അയിരൂരിലെ സ്വകാര്യ പ്രസ്സില് ജോലി ചെയ്യുന്ന ഷാലു ഉച്ചയോടെ വീട്ടില് എത്തി ഭക്ഷണം കഴിച്ചു തിരികെ സ്കൂട്ടിയില് മടങ്ങവെ അനില് തടഞ്ഞു നിര്ത്തി കഴുത്തിലും ശരീരത്തിലും വെട്ടി പരിക്കേല്പിക്കുകയായിരുന്നു. ഷാലുവിനെ വെട്ടിയ ശേഷം അനില് വെട്ടുകത്തി വീശി ഭീകരാന്തരീക്ഷം സൃഷ്ടിച്ചു. ബന്ധുക്കള് പോലീസില് അറിയിച്ചതിനെ വിവരം തുടര്ന്ന് അയിരൂര് പോലീസ് എത്തി അനിലിനെ കീഴടയ്ക്കുകയായിരുന്നു. കടം കൊടുത്ത പണം ഷാലു തിരികെ കൊടുക്കാത്ത വിരോധത്താല് കൊലപ്പെടുത്തിയെന്നാണ് കേസ്. തീവ്രപരിചരണ വിഭാഗത്തില് ചികിത്സയിലായിരുന്ന ഷാലു മെയ് 3ന് ഉച്ചയോടെ മരണപ്പെട്ടു.
