തിരുവനന്തപുരം: കുടിവെള്ള വിതരണ സേവനങ്ങള്‍ കൂടുതല്‍ മെച്ചപ്പെടുത്തുന്നതിന്റെ ഭാഗമായി കേരള വാട്ടര്‍ അതോറിറ്റിയുടെ കീഴില്‍ മൂന്നു പുതിയ ഡിവിഷനുകള്‍ കൂടി നിലവില്‍ വന്നു. ആലപ്പുഴ സര്‍ക്കിളിനു കീഴില്‍ പബ്ലിക് ഹെല്‍ത്ത് ഡിവിഷന്‍ കായംകുളം, കണ്ണൂര്‍ സര്‍ക്കിളിനു കീഴില്‍ പ്രോജക്ട് ഡിവിഷന്‍ കാഞ്ഞങ്ങാട്, കോട്ടയം സര്‍ക്കിളിനു കീഴില്‍ പ്രോജക്ട് ഡിവിഷന്‍ മീനച്ചല്‍ മലങ്കര എന്നിവയാണ് പുതുതായി നിലവില്‍ വന്ന ഡിവിഷനുകള്‍.
എക്‌സിക്യൂട്ടീവ് എന്‍ജിനീയര്‍ മേലധികാരിയായ ഡിവിഷനുകളില്‍ ജീവനക്കാരെ പുനര്‍വിന്യാസം വഴിയാണ് നിയമിച്ചിട്ടുള്ളത്. കായംകുളം പിഎച്ച് ഡിവിഷന്റെ പരിധിയില്‍ പിഎച്ച് സബ്ഡിവിഷന്‍ എടത്വ, വാട്ടര്‍ സപ്ലൈ പ്രോജക്ട് സബ്ഡിവിഷന്‍ ഹരിപ്പാട്, വാട്ടര്‍ സപ്ലൈ പ്രോജക്ട് സബ്ഡിവിഷന്‍ മാവേലിക്കര എന്നീ ഓഫീസുകളെ ഉള്‍പ്പെടുത്തി.
കാസര്‍കോട് ജില്ലയില്‍ വാട്ടര്‍ അതോറിറ്റിയുടെ ആദ്യ പ്രോജക്ട് ഡിവിഷനാണ് കാഞ്ഞങ്ങാട്ട് നിലവില്‍ വരുന്നത്. 1744.66 കോടി രൂപയുടെ ജലജീവന്‍ മിഷന്‍ പദ്ധതികള്‍ക്ക് ഭരണാനുമതി ലഭിച്ചിട്ടുള്ള ജില്ലയില്‍ പദ്ധതി നിര്‍മാണങ്ങള്‍ക്ക് കൂടുതല്‍ കാര്യക്ഷമത ലഭിക്കാനാണ് പുതിയ പ്രോജക്ട് ഡിവിഷന്‍ അനുവദിച്ചത്.
മലങ്കര ഡാമിനെ ആധാരമാക്കിയുള്ള 1243 കോടി രൂപയുടെ ജലജീവന്‍ മിഷന്‍ പദ്ധതി നിര്‍മാണം കൂടുതല്‍ കാര്യക്ഷമമായി നിര്‍വഹിക്കാനാണ് കോട്ടയം ജില്ലയിലെ പാലാ ആസ്ഥാനമാക്കി മീനച്ചില്‍ മലങ്കര പ്രോജക്ട് ഡിവിഷനു രൂപം നല്‍കിയത്.
പാലാ, പൂഞ്ഞാര്‍, കാഞ്ഞിരപ്പള്ളി നിയോജക മണ്ഡലങ്ങളിലെ വാട്ടര്‍ അതോറിറ്റിയുടെ പദ്ധതി നിര്‍വഹണച്ചുമതലയും പുതിയ ഡിവിഷനുണ്ടായിരിക്കും.
കേരള വാട്ടര്‍ അതോറിറ്റിയുടെ കീഴില്‍, പദ്ധതി നിര്‍മാണ പ്രവര്‍ത്തനങ്ങളുടെ മേല്‍നോട്ട ചുമതലയുള്ള പ്രോജക്ട് ഡിവിഷന്‍, പബ്ലിക് ഹെല്‍ത്ത്, വാട്ടര്‍ സപ്ലൈ എന്നീ വിഭാഗങ്ങളിലായി ആകെ ഡിവിഷനുകളുടെ എണ്ണം 48 ആയി.
പ്രതികരിക്കാൻ ഇവിടെ എഴുതുക: