കൊല്ക്കത്ത: 15 വയസ്സുകാരിയായ ഹിന്ദു പെണ്കുട്ടിയെ തട്ടിക്കൊണ്ടു പോയി നിര്ബന്ധിത മതം മാറ്റത്തിന് ശ്രമിച്ചതായി പരാതി. പശ്ചിമബംഗാളിലെ മേദിനിപൂരിലാണ് സംഭവം. അസിബുര് റഹ്മാന് എന്നയാളാണ് കുട്ടിയെ തട്ടിക്കൊണ്ട് പോയത്. തൃണമൂല് കോണ്ഗ്രസിലെ ഒരു നേതാവാണ് ഇയാള്ക്ക് ആവശ്യമായ സഹായങ്ങള് ചെയ്ത് നല്കുന്നതെന്നാണ് വിവരം. സംഭവത്തില് പോലീസിന്റെ ഭാഗത്ത് നിന്ന് നടപടിയുണ്ടാകുന്നില്ലെന്നും കുടുംബം ആരോപിക്കുന്നു.
മേദിനിപൂരിലെ പിംഗ്ല ഗ്രാമത്തിലാണ് പെണ്കുട്ടി താമസിച്ചിരുന്നത്. പെണ്കുട്ടിയെ കൊണ്ടുപോകുമെന്ന് അസിബുള് പലപ്പോഴും ഭീഷണിപ്പെടുത്തിയിരുന്നു. പിന്നാലെ സിക്കിമിലുള്ള ബന്ധുവീട്ടിലേക്ക് കുടുംബം പെണ്കുട്ടിയെ മാറ്റി. ഇവിടെ നിന്നാണ് പെണ്കുട്ടിയെ കാണാതാകുന്നത്. പിന്നാലെ കുടുംബാംഗങ്ങള് പിംഗ്ല പോലീസ് സ്റ്റേഷനില് പരാതി നല്കിയെങ്കിലും, അസിബുര് റഹ്മാന് തന്റെ രാഷ്ട്രീയ സ്വാധീനം ഉപയോഗിച്ച് ഈ കേസ് ഒതുക്കി തീര്ക്കുകയായിരുന്നു.
പോലീസ് അന്വേഷണം നടത്താന് തയ്യാറാകാത്ത സാഹചര്യത്തില് പെണ്കുട്ടിയുടെ പിതാവ് കൊല്ക്കത്ത ഹൈക്കോടതിയെ സമീപിച്ചു. മകളെ തിരിച്ചു കിട്ടണമെന്ന് ആവശ്യപ്പെട്ട് ഹര്ജി നല്കിയതിന് പിന്നാലെ കുടുംബത്തിന് ആവശ്യമായ സുരക്ഷ ഒരുക്കണമെന്ന് പോലീസിന് കോടതി നിര്ദ്ദേശം നല്കി. പരാതിയില് തുടരന്വേഷണം നടത്താത്ത പോലീസ് നടപടിയില് കോടതി കടുത്ത അതൃപ്തി രേഖപ്പെടുത്തി.
