കെ.സുരേന്ദ്രന്
ഭാരതത്തിന്റെ സമകാലീന സാഹചര്യം ജന്മഭൂമി ദിനപത്രത്തിന്റെ പ്രസക്തി വിളിച്ചു പറയുന്നതാണ്. ചൈനയുടെ ഫണ്ടിംഗോടെ പ്രവര്ത്തിക്കുന്ന ന്യൂസ് ക്ലിക്ക് എന്ന പോര്ട്ടലില് എന്ഐഎ നടത്തിയ റെയിഡ് നമ്മുടെ രാജ്യത്തെ മാധ്യമലോകത്തെ ദേശവിരുദ്ധ ശക്തികളുടെ സ്വാധീനം എത്രത്തോളം ഉണ്ടെന്നതിന്റെ തെളിവാണ്.
വിദേശ രാജ്യത്തിന്റെ ഫണ്ട് വാങ്ങുന്നവരില് പല പ്രമുഖ മാധ്യമപ്രവര്ത്തകരും മാധ്യമങ്ങളുമുണ്ടെന്നത് ഓരോ ദേശസ്നേഹിയും ആശങ്കയോടെയാണ് കാണുന്നത്. മാധ്യമങ്ങള് ദേശവിരുദ്ധ ശക്തികളുടെ കളിപാവകളായി അറിഞ്ഞോ അറിയാതെയോ മാറുന്ന ഈ സാഹചര്യത്തില് ദേശീയത ഉയര്ത്തി പിടിക്കുന്ന ജന്മഭൂമി കൂടുതല് വായനക്കാരിലേക്ക് എത്തേണ്ടതുണ്ട്. അടിസ്ഥാന ജനവിഭാഗങ്ങള് പ്രതീക്ഷയോടെ കാണുന്ന പത്രമാണ് ജന്മഭൂമി. മനുഷ്യന്റെ ജീവല് പ്രശ്നങ്ങള് ഉയര്ത്തിക്കൊണ്ടുവരാന് നമ്മുടെ നാട്ടില് ജന്മഭൂമി മാത്രമേയുള്ളൂ.
കരുവന്നൂരിലും കണ്ടലയില് പാവപ്പെട്ടവര് ചോര നീരാക്കി നിക്ഷേപിച്ച പണം രാഷ്ട്രീയ തമ്പുരാക്കന്മാര് കൊള്ളയടിച്ചപ്പോള് അവരുടെ പക്ഷത്ത് നിന്ന് പോരാടാന് ജന്മഭൂമിയാണ് മുന്നില് നിന്നത്. ജന്മഭൂമിയുടെ പ്രചരണം വര്ദ്ധിപ്പിക്കാന് എല്ലാ ബിജെപി പ്രവര്ത്തകരും മുന്നിട്ടിറങ്ങണമെന്ന് അഭ്യര്ത്ഥിക്കുന്നു.
