ഫെന്‍സിങ്: പുരുഷ, വനിതാ ടീമുകള്‍ പുറത്തായി

ഹാങ്‌ചോ: ഏഷ്യന്‍ ഗെയിംസ് ഫെന്‍സിങ്ങ് ടീം ഇനത്തില്‍ ഭാരതത്തിന്റെ വനിതകള്‍ ക്വാര്‍ട്ടറിലും പുരുഷന്‍മാര്‍ പ്രീക്വാര്‍ട്ടറിലും പുറത്തായി. ക്വാര്‍ട്ടര്‍ വരെ മുന്നേറിയ വനിതാ എപ്പീ ടീം കരുത്തരായ കൊറിയയോട് ക്വാര്‍ട്ടറില്‍ 25-45നാണ് പുറത്തായത്. പുരുഷ ഫോയില്‍ ടീം പ്രീക്വാര്‍ട്ടറില്‍ തോറ്റ് സിംഗപ്പൂരിനോട് 30-45ന് പരാജയപ്പെട്ടു.

തനിഷ്‌കാ ഖത്രി, ജ്യോതിക ദത്ത, എനാ എറോറ എന്നിവരാണ് വനിതകളില്‍ മത്സരിക്കാനിറങ്ങിയത്. നേരത്തെ പ്രീക്വാര്‍ട്ടറില്‍ ജോര്‍ദാനെ കീഴടക്കിയാണ് വനിതാ ടീം മുന്നേറിയത്. ജോര്‍ദാനെതിരെ 45-36നാണ് വിജയിച്ചത്. കൊറിയയോട് നിരുപാധികം കീഴടങ്ങിയ ടീം 20 പോയിന്റ് മാര്‍ജിനിലാണ് പരാജയപ്പെട്ടത്.

പുരുഷ ഫോയില്‍ ടീം പ്രീക്വാര്‍ട്ടറില്‍ അവസാന റൗണ്ടില്‍ ബിബിഷ് കതിരേശന് ജയം നേടാനായത് മാത്രമാണ് ഭാരതത്തിന്റെ ഏക ആശ്വാസം. അവസാന റൗണ്ടില്‍ സിംഗപ്പൂരിന്റെ കിയെറെന്‍ ലോക്കിനെ 6-5ന് കീഴടക്കുകയായിരുന്നു. എന്നാല്‍ അതുവരെ ഒരു റൗണ്ട് പോലും ജയിക്കാനായില്ല.

കിയെറെനോട് 2-5ന് തോറ്റുകൊണ്ട് ദേവ് ആണ് മത്സരത്തിലെ ആദ്യറൗണ്ട് പൂര്‍ത്തിയാക്കിയത്. പിന്നെ കതിരേശന്‍ റാഫേലിനോട് തോറ്റു, അര്‍ജുന്‍ എലിജാഹ് റോബ്‌സണിനോട് തോറ്റു. ദേവ് വീണ്ടും തോറ്റു. ടാനിനോട് 7-20ന്. പിന്നാലെ അര്‍ജുനും കതിരേശനും വീണ്ടും തോല്‍വി ഏറ്റുവാങ്ങി.

പിന്നീടിറങ്ങിയ ഭാരതത്തിന്റെ ആകാശ് സിംഗപ്പൂരിന്റെ ട്യാന്‍ വെയ് ജോനാതനുമായി സമനിലയില്‍ പിരിഞ്ഞു. തൊട്ടടുത്ത റൗണ്ടില്‍ ദേവ് സാമുവലിനെയും സമനിലയില്‍ പിടിച്ചു. ഈ സമയംകൊണ്ട് ഭാരതം 24-40ന് പിന്നിലായിക്കഴിഞ്ഞിരുന്നു. അവസാന റൗണ്ടില്‍ കതിരേശന്‍ നേടിയ 6-5 വിജയംകൊണ്ട് കാര്യമുണ്ടായില്ല.