തിരുവനന്തപുരം: സംസ്ഥാനത്തെ സഹകരണ മേഖലയെ തകര്‍ക്കാന്‍ ശ്രമം നടക്കുകയാണെന്ന് മുഖ്യമന്ത്രി പിണറായി വിജയന്‍. കരുവന്നൂര്‍ ബാങ്കിനെതിരായ ആരോപണങ്ങള്‍ ഗൗരവമായാണ് കാണുന്നത്. കേരളത്തിലെ സഹകരണ മേഖല ചിലരുടെ ഉറക്കം കെടുത്തുകയാണെന്നും മുഖ്യമന്ത്രി പറഞ്ഞു.
സഹകരണ മേഖലയിലെ ക്രമക്കേട് തടയാന്‍ 50 വര്‍ഷം പഴക്കമുള്ള നിയമങ്ങളെ പരിഷ്‌കരിച്ചു. സംസ്ഥാനത്തെ സഹകരണ സംഘങ്ങളില്‍ 98.5 ശതമാനവും കുറ്റമറ്റതാണ്. വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
കേരളത്തിലെ സഹകരണ പ്രസ്ഥാനം നാടിന് വലിയ സംഭാവന ചെയ്യുന്നുണ്ടെന്ന് മുഖ്യമന്ത്രി പറഞ്ഞു. അതിനകത്ത് വഴിവിട്ട് സഞ്ചരിച്ച ആരെങ്കിലുമുണ്ടെങ്കില്‍ അവര്‍ക്കെതിരെ നടപടി വേണെന്നതില്‍ അഭിപ്രായ വ്യത്യാസമില്ലെന്നും അദ്ദേഹം പറഞ്ഞു.
ഇ.ഡിയുടെ ലക്ഷ്യം വിജയിക്കാന്‍ പോകുന്നില്ല. ഇ ഡിയുടെ അന്വേഷണത്തെക്കുറിച്ച് തനിക്കൊന്നും പറയാന്‍ കഴിയില്ല.
ചിലയാളുകളെയെടുത്ത് അവര്‍ക്ക് ബിനാമിയുണ്ടെന്ന് പറഞ്ഞാല്‍ ഇല്ല എന്ന് സമൂഹത്തിന് അറിയാം. വലിയൊരു പാത്രത്തില്‍ ചോറുണ്ട്. അതില്‍ ഒരു കറുത്ത വറ്റുണ്ടെന്ന് വിചാരിക്കുക. ആ വറ്റെടുത്ത് ഇത് മോശം ചോറാണെന്ന് പറയാനാകുമോയെന്നും മുഖ്യമന്ത്രി ചോദിച്ചു.
കരുവന്നൂര്‍ വിഷയം ഉയര്‍ന്നപ്പോള്‍ പൊലീസും ക്രൈംബ്രാഞ്ചും ക്രിയാത്മകമായി ഇടപെട്ടു. 18 എഫ് ഐ ആര്‍ രജിസ്റ്റര്‍ ചെയ്തെന്നും മുഖ്യമന്ത്രി പറഞ്ഞു. കേസില്‍ 26 പ്രതികളുണ്ട്. ക്രൈംബ്രാഞ്ച് അന്വേഷണത്തിനിടെ ഇ ഡി എത്തിയെന്നും അവരുടെ ലക്ഷ്യം വിജയിക്കില്ലെന്നും മുഖ്യമന്ത്രി പറഞ്ഞു.
