നാദാപുരം: കല്ലാച്ചി ടൗൗണിൽ വിദ്യാർത്ഥിനിയെ കുത്തിപ്പരിക്കേൽപ്പിച്ച യുവാവ് അറസ്റ്റിൽ. മാണിമേൽ നിടുംപറമ്പ് നടുത്തറേമ്മൽ കോട്ട അർഷാദ് ആണ് അറസ്റ്റിലായത്. അക്രമം നടത്തിയ പ്രതിയെ തടഞ്ഞു നിർത്തുന്നതിനിടെ കല്ലാച്ചി പിപി സ്റ്റോർ ഉടമ പിപി അഫ്സലിനും പരിക്കേറ്റിരുന്നു. വിവാഹത്തിൽ നിന്നും പിൻവാങ്ങിയതിന്റെ വിരോധമാണ് ആക്രമണത്തിന് പിന്നിലെന്ന് പെൺകുട്ടി പറഞ്ഞു.
ചൊവ്വാഴ്ച ഉച്ചയ്ക്ക് ഒന്നരയോടെയായിരുന്നു സംഭവം. നഴ്സറി അദ്ധ്യാപക കോഴ്സ് വിദ്യാർത്ഥിനിയായ പതിനേഴുകാരിക്ക് നേരെയാണ് ആക്രമണം ഉണ്ടായത്.പതിനേഴുവയസുകാരിയായ പെൺകുട്ടി ക്ലാസ് കഴിഞ്ഞ് വീട്ടിലേക്ക് മടങ്ങവെയായിരുന്നു ആക്രമണം. പെൺകുട്ടിയുടെ മുഖത്തടിച്ചതിനെ തുടർന്ന് ഓടി രക്ഷപ്പെടാൻ ശ്രമിച്ച പെൺകുട്ടിയെ കത്തികൊണ്ട് കുത്തുകയായിരുന്നു.
സംഭവത്തിന് പിന്നാലെ കച്ചവടക്കാരും നാട്ടുകാരും ചേർന്ന് പ്രതിയെ ബലമായി കീഴ്പ്പെടുത്തുകയായിരുന്നു. എട്ട് മാസങ്ങൾക്ക് മുമ്പാണ് പ്രവാസിയായ അർഷാദും യുവതിയും തമ്മിലുള്ള വിവാഹം നിശ്ചയിക്കുന്നത്. പിന്നീട് അഭിപ്രായ വ്യത്യാസത്തെ തുടർന്ന് പെൺകുട്ടി വിവാഹത്തിൽ നിന്നും പിന്മാറി. ഇതോടെ കുടുംബത്തിന് നേരെ ഭീഷണിയുമായി യുവാവ് എത്തിയിരുന്നെന്നും തുടർന്ന് താമസം വരെ മാറ്റിയിരുന്നതായും പെൺകുട്ടിയുടെ പിതാവ് പറയുന്നു.
